E Kanto di tur Kanto 1

BSNP Edita

E Kanto di tur Kanto 1

1:1 Salomon su Kantika di Kantikanan.

1:2 "O, ku e sunchi mi ku e sunchinan di su boka! Pasobra bo amor ta mihó ku biña.

1:3 Bo zetanan tin un holó dushi, manera zeta purifiká bo nòmber ta; pesei e birgennan ta stimabo.

1:4 Hibami ku bo i laga nos kore huntu! Rei a hibami den su kambernan." "Nos lo ta kontentu i regosihá den bo; nos lo alabá bo amor mas ku biña." "Ku rason nan ta stimabo.

1:5 "Mi ta pretu, ma bunita, O yu muhénan di Jerusalèm, manera e tèntnan di Kedar, manera e kortinanan di Salomon.

1:6 No keda wak mi pasobra mi ta pretu, pasobra solo a kimami. E yu hòmbernan di mi mama tabata rabiá ku mi; nan a hasimi kuidadó di e kunukunan di wendrùif, ma mi no a kuida mi mes kunuku di wendrùif.

1:7 Bisami, abo, kende mi alma ta stima, unda bo ta pastoriá bo tou, unda bo ta laga bo tou drumi mèrdia? Pasobra pakiko mi mester ta manera un muhé ku ta tapa su mes ku velo banda di e tounan di bo kompañeronan?"

1:8 "Si bo no sa, abo, esun di mas bunita entre muhénan, sigui lastro di e tou, i pastoriá bo kabritunan chikitu banda di e tèntnan di e wardadónan di karné."

1:9 "Mi amor, pa mi bo ta manera mi yewa entre e garoshinan di Farao.

1:10 Bo band'i kara ta bunita ku adornonan, bo garganta tur na koyar di kuenta."

1:11 "Nos lo traha adornonan di oro pa bo, ku kuenta di plata."

1:12 "Mientras ku rei tabata na su mesa, mi perfume tabata manda su holó dushi.

1:13 Mi stimá ta un saku di mirra pa mi, ku ta keda henter anochi entre mi pechunan.

1:14 Mi stimá ta un bòshi di flor di hena pa mi den e kunukunan di wendrùif di En-gadi."

1:15 "Ki bunita bo ta, mi amor, ki bunita bo ta! Bo wowonan ta manera palomba."

1:16 "Ki nèchi bo ta, mi stimá, i asina plasentero! Di bèrdat, nos kama ta luhoso!

1:17 E balkinan di nos kas ta di palu di seda, nos spannan, di palu di siprès.

Predikador 12 E Kanto di tur Kanto 2