Salmonan 92

BSNP Edita

92:1 Ta bon pa duna gradisimentu na SEÑOR, i pa kanta alabansa na Bo nòmber, O Haltísimo;

92:2 pa deklará Bo miserikòrdia den mainta, i Bo fieldat tur anochi,

92:3 ku un instrumènt di dies kuèrdè, i ku arpa, ku muzik resonante, toká riba lirio.

92:4 Pasobra Abo, O SEÑOR, a hasimi kontentu ku loke Bo a hasi; pa motibu di e obranan di Bo mannan lo mi kanta di goso.

92:5 Ki grandi ta Bo obranan, O SEÑOR! Bo pensamentunan ta masha profundo.

92:6 Hende sin sintí no tin konosementu, tampoko un hende bobo no ta komprendé esaki,

92:7 ku ora e malbado spreit manera yerba, i tur ku ta hasi inikidat floresé, ta pa nan wòrdu destruí pa semper.

92:8 Ma Abo, O SEÑOR, ta halsá pa semper.

92:9 Pasobra mira, Bo enemigunan, O SEÑOR, pasobra mira, Bo enemigunan lo peresé; tur ku ta hasi inikidat lo wòrdu plamá.

92:10 Ma Abo a halsa mi kachu manera kachu di buey di mondi; mi a wòrdu ungí ku zeta fresku.

92:11 I mi wowo a wak ku satisfakshon riba mi enemigunan; mi oreanan a tende di e hasidónan di maldat ku ta lanta kontra mi.

92:12 E hende hustu lo floresé manera palma, e lo krese manera palu di seda na Líbano.

92:13 Plantá den e kas di SEÑOR, nan lo floresé den e plenchinan di nos Dios.

92:14 Asta den nan biehes nan lo duna fruta; nan lo ta yen di vigor i bèrdè-bèrdè,

92:15 pa deklará ku SEÑOR ta rekto; E ta mi baranka, i no tin inhustisia den djE.