Salmonan 90

BSNP Edita

Salmonan 90

90:1 SEÑOR, Bo tabata un refugio pa nos den tur generashon.

90:2 Promé ku e serunan a nase, i ku Bo a forma tera i mundu, sí, for di etèrnidat te na etèrnidat, Abo ta Dios.

90:3 Bo ta hasi hende bolbe na stòf, i ta bisa: "Bolbe, O yunan di hende."

90:4 Pasobra mil aña den Bo bista ta manera e dia di ayera ku a pasa bai, òf manera un warda di anochi.

90:5 Bo ta spula nan bai kuné manera un diluvio; nan ta manera un soño. Mainta nan ta manera yerba ku ta krese di nobo.

90:6 Mainta e ta floresé i ta spreit di nobo; atardi e ta marchitá i ta seka.

90:7 Pasobra Bo rabia a kaba ku nos, i dor di Bo furia nos a keda terorisá.

90:8 Bo a pone nos inikidatnan Bo dilanti, nos pikánan sekreto den e lus di Bo presensia.

90:9 Pasobra tur nos dianan a pasa den Bo furia; nos a tèrminá nos añanan manera un suspiro.

90:10 E dianan di nos bida ta setenta aña, òf si hende tin hopi forsa, ochenta aña; tòg nan orguyo no ta nada otro ku molèster i pena, pasobra un djis el a pasa, i nos ta bula bai.

90:11 Ta ken ta komprendé e poder di Bo rabia, i Bo furia, konforme e reverensia ku Bo meresé?

90:12 Asina anto, siña nos konta nos dianan, pa nos por presentá na Bo un kurason yen di sabiduria.

90:13 Bolbe, O SEÑOR; kuantu tempu mas? Tene duele di Bo sirbidónan.

90:14 O satisfasé nos den mainta ku Bo miserikòrdia, ku nos por kanta di goso i ta kontentu tur nos dianan.

90:15 Hasi nos kontentu konforme e dianan ku Bo a afligí nos, konforme e añanan ku nos a mira maldat.

90:16 Revelá Bo obra na Bo sirbidónan, i Bo gloria na nan yunan.

90:17 I laga e grasia di Señor nos Dios keda riba nos, i konfirmá e obra di nos mannan pa nos, sí, konfirmá e obra di nos mannan.

Salmonan 89 Salmonan 91