Salmonan 89

BSNP Edita

Salmonan 89

89:1 Lo mi kanta di e miserikòrdia di SEÑOR pa semper; ku mi boka lo mi hasi Bo fieldat konosí na tur generashon.

89:2 Pasobra mi a bisa: "Miserikòrdia lo wòrdu edifiká pa semper; lo Bo stablesé Bo fieldat den e shelunan."

89:3 "Mi a sera un aliansa ku Mi skohí; Mi a hura na David, Mi sirbidó:

89:4 'Lo Mi stablesé bo simia pa semper, i edifiká bo trono pa tur generashon.'"

89:5 I e shelunan lo alabá Bo maraviyanan, O SEÑOR; tambe Bo fieldat den e asamblea di e santunan.

89:6 Pasobra ta ken den e shelunan por ta di kompará ku SEÑOR? Ta ken entre e yunan di e poderosonan ta manera SEÑOR?

89:7 Den e asamblea di e santunan Dios ta grandemente temí; E ta mas temibel ku tur esnan ku ta rònt di djE.

89:8 O Señor DIOS di ehérsitonan, ken ta manera Bo, O SEÑOR poderoso? I Bo fieldat ta rondonáBo.

89:9 Bo ta goberná e laman brabu; ora su olanan lanta, Bo ta kalma nan.

89:10 Abo mes a plècha Rahab lagu'é manera un hende ku a wòrdu matá; Bo a plama Bo enemigunan ku Bo brasa poderoso.

89:11 E shelunan ta di Bo, tera tambe ta di Bo; mundu i tur loke ku e ta kontené, Abo a funda nan.

89:12 Nòrt i sùit, Abo a krea nan; Tabor i Hermon ta grita di alegria ora nan tende Bo nòmber.

89:13 Bo tin un brasa fuerte; Bo man ta poderoso, Bo man drechi ta halsá.

89:14 Hustisia i huisio ta e fundeshi di Bo trono; miserikòrdia i bèrdat ta bai Bo dilanti.

89:15 Bendishoná ta e pueblo ku konosé e zonidu gososo! Nan ta kana, O SEÑOR, den e lus di Bo semblante.

89:16 Den Bo nòmber nan ta regosihá henter dia, i pa medio di Bo hustisia nan ta wòrdu halsá.

89:17 Pasobra Abo ta e gloria di nan fortalesa, i pa medio di Bo grasia nos kachu ta wòrdu halsá.

89:18 Pasobra nos eskudo ta pertenesé na SEÑOR, i nos rei na Esun Santu di Israel.

89:19 Un biaha Bo a papia den vishon ku Bo santunan, i a bisa: "Mi a duna yudansa na un di e poderosonan; Mi a halsa un di e skohínan for di entre e pueblo.

89:20 Mi a haña David, Mi sirbidó; ku Mi zeta santu Mi a ungié.

89:21 Mi man lo ta semper kuné; Mi brasa tambe lo fortifik'é.

89:22 E enemigu lo no por eksigí nada for di djé, ni e yu di maldat lo no afligié.

89:23 Ma lo Mi plècha su atversarionan su dilanti, i derotá esnan ku ta odi'é.

89:24 Ma Mi fieldat i Mi miserikòrdia lo ta kuné, i den Mi nòmber su kachu lo wòrdu halsá.

89:25 Tambe lo Mi pone su man riba e laman, i su man drechi riba e riunan.

89:26 E lo sklama na Mi: 'Abo ta mi Tata, mi Dios, i e baranka di mi salbashon.'

89:27 Tambe lo Mi hasié Mi primogénito, esun mas haltu di e reinan di tera.

89:28 Pa semper lo Mi konservá Mi miserikòrdia p'é, i Mi aliansa kuné lo keda firme.

89:29 I lo Mi stablesé su desendientenan pa semper, i su trono manera e dianan di shelu.

89:30 "Si su yunan bandoná Mi lei, i no kana den Mi huisionan,

89:31 si nan violá Mi statutonan, i no warda Mi mandamentunan,

89:32 e ora ei lo Mi kastigá nan transgreshonnan ku bara, i nan inikidat ku sota.

89:33 Ma lo Mi no kita Mi miserikòrdia for di djé, ni pèrmití Mi fieldat faya.

89:34 Lo Mi no violá Mi aliansa, ni kambia loke ta sali for di Mi lepnan.

89:35 Un biaha Mi a hura pa Mi mes santidat; lo Mi no gaña David.

89:36 Su desendientenan lo permanesé pa semper, i su trono lo permanesé manera solo Mi dilanti.

89:37 E lo ta stablesí pa semper manera luna, i e testigu na shelu ta fiel."

89:38 Ma Abo a rechasá i a aboresé, Bo tabata yen di furia kontra Bo ungí;

89:39 Bo a despresiá e aliansa di Bo sirbidó, Bo a profaná su korona i a bent'é abou na suela;

89:40 Bo a kibra tur su murayanan bash'abou, Bo a hasi su lugánan fortifiká bira un ruina;

89:41 tur hende ku pasa pa e kaminda ei ta plùnder é, el a bira un reproche pa su bisiñanan;

89:42 Bo a halsa e man drechi di su atversarionan, Bo a hasi tur su enemigunan regosihá;

89:43 tambe Bo a dobla e filo di su spada, i no a sosten'é den bataya;

89:44 Bo a pone un fin na su splendor, i a tira su trono abou na suela;

89:45 Bo a hasi e dianan di su hubentut mas kòrtiku, Bo a kubrié ku bèrguensa.

89:46 Kuantu tempu mas, O SEÑOR? Lo Bo skonde Bo mes pa semper? Bo furia lo kima manera kandela?

89:47 Kòrda kon kòrtiku mi bida ta, pa ki banidat Bo a krea tur yu di hende!

89:48 Ken ta e hende ku lo biba i no mira morto? E por libra su alma for di e poder di Seol?

89:49 O Señor, unda Bo miserikòrdianan di antes ta, ku Bo a hura na David den Bo fieldat?

89:50 Kòrda, O Señor, e reproche di Bo sirbidónan, kon mi ta karga e reproche di hopi pueblo den mi bus,

89:51 ku kual Bo enemigunan a reprochá, O SEÑOR, ku kual nan a reprochá e pasonan di Bo ungí.

89:52 Bendishoná sea SEÑOR pa semper! Amèn i Amèn.n BUKI IVr Salmo 90-106

Salmonan 88 Salmonan 90