Salmonan 84

BSNP Edita

Salmonan 84

84:1 Ki dushi ta Bo lugánan di biba, O SEÑOR di ehérsitonan!

84:2 Mi alma ta anhelá, sí, ta antohá pa e pationan di SEÑOR; mi kurason i mi karni ta kanta ku goso na e Dios bibu.

84:3 Asta mòfi a haña un kas, i zwarchi un neishi pa su mes, kaminda e por pone su yunan, esta, Bo altarnan, O SEÑOR di ehérsitonan, mi Rei i mi Dios.

84:4 Bendishoná ta esnan ku ta biba den Bo kas; pa semper nan ta alabáBo.

84:5 Bendishoná ta e hende, kende su fortalesa ta den Bo, den kende su kurason e kamindanan pa Sion ta.

84:6 Pasando dor di e Vaye di Baka, nan ta hasié bira un fuente; tambe e promé yobida ta tap'é ku bendishon.

84:7 Nan ta bai di forsa pa forsa, i nan tur ta presentá dilanti di Dios na Sion.

84:8 O SEÑOR Dios di ehérsitonan, tende mi orashon; skucha, O Dios di Jakòb!

84:9 O Dios, nos eskudo, opservá i mira e kara di Bo ungí.

84:10 Pasobra un dia den Bo pationan ta mihó ku mil dia pafó. Mi ta preferá di para na entrada di e kas di mi Dios ku biba den e tèntnan di maldat.

84:11 Pasobra SEÑOR Dios ta un solo i un eskudo; SEÑOR ta duna grasia i gloria; E no ta keda sin duna loke ta bon na esnan ku ta kana den rektitut.

84:12 O SEÑOR di ehérsitonan, bendishoná ta e hende ku ta konfia den Bo!

Salmonan 83 Salmonan 85