Salmonan 59

BSNP Edita

Salmonan 59

59:1 Librami for di mi enemigunan, O mi Dios; protehámi for di esnan ku ta lanta kontra mi.

59:2 Librami for di esnan ku ta hasi inikidat, i salbami for di hòmbernan dramadó di sanger.

59:3 Pasobra mira, nan a skonde pa atakámi; hòmbernan poderoso ta konspirá kontra mi, no pa mi transgreshon, ni pa mi piká, O SEÑOR;

59:4 sin ningun kulpa di mi banda nan ta kore bin i ta prepará nan mes. Lanta riba pa bin yudami, i mira!

59:5 I Abo, O SEÑOR Dios di ehérsitonan, e Dios di Israel, lanta pa kastigá tur e nashonnan; no tene miserikòrdia di ningun traidó malbado.

59:6 Nan ta bolbe atardi, nan ta yora manera kachó, i ta bai rònt den stat.

59:7 Mira, nan ta respu ku nan boka; tin spada riba nan lepnan, pasobra nan ta puntra: "Ken ta tende?"

59:8 Ma Abo, O SEÑOR, ta hari nan; Bo ta hasi bofon di tur e nashonnan.

59:9 Mi fortalesa, riba Bo lo mi spera, pasobra Dios ta mi defensa.

59:10 Mi Dios lo kontra ku mi den Su miserikòrdia; Dios lo lagami mira triunfantemente riba mi enemigunan.

59:11 No mata nan, pa mi pueblo no lubidá; plama nan pa medio di Bo poder i baha nan te na suela, O Señor, nos eskudo.

59:12 Pa motibu di e piká di nan boka i e palabranan di nan lepnan, laga nan wòrdu kohí den nan orguyo. I pa motibu di maldishonnan i mentiranan ku nan ta papia,

59:13 destruí nan den furia, destruí nan pa nan no t'ei mas; pa hende por sa ku Dios ta goberná den Jakòb, te na e finnan di tera.

59:14 I nan ta bolbe atardi, nan ta yora manera kachó, i ta kana rònt den stat.

59:15 Nan ta dwal rònt pa buska kuminda, i nan ta gruña si nan no haña basta.

59:16 Ma pa loke t'ami, lo mi kanta di Bo fortalesa; sí, mainta lo mi kanta ku goso di Bo miserikòrdia; pasobra Bo tabata mi defensa, i un refugio den e dia di mi angustia.

59:17 O mi fortalesa, lo mi kanta alabansa na Bo; pasobra Dios ta mi defensa, e Dios ku ta mustra miserikòrdia na mi.Un Miktam di David, pa siñansa, tempu ku e tabata bringa ku Aram-naharaim i ku Aram-zoba, tempu ku Joab a bolbe i a mata diesdos mil hende di Edòm den e Vaye di Salu.

Salmonan 58 Salmonan 60