Salmonan 41

BSNP Edita

41:1 Bendishoná ta esun ku ta kòrda riba e pobernan; SEÑOR lo libr'é den e dia di angustia.

41:2 SEÑOR lo proteh'é i ten'é na bida, i e lo wòrdu yamá bendishoná riba tera; i lo Bo no entregu'é na e boluntat di su enemigunan.

41:3 SEÑOR lo sosten'é riba su kama di malesa; den su enfermedat Abo ta restor'é hasié salú.

41:4 Ma pa loke t'ami, mi a bisa: "O SEÑOR, tene miserikòrdia di mi; kura mi alma, pasobra mi a peka kontra Bo."

41:5 Mi enemigunan ta papia malu kontra mi: "Ki dia lo e muri i su nòmber peresé?"

41:6 I ora ku e bin bishitámi, e ta papia mentira; su kurason ta rekohé maldat pa su mes; ora ku e sali bai pafó, e ta konta esaki.

41:7 Tur ku ta odiami ta papia kuchikuchi riba mi; nan ta plania maldat kontra mi, bisando:

41:8 "Un kos malu a wòrdu bashá riba djé, ku ora e kai drumi e lo no lanta mas."

41:9 Asta mi amigu íntimo, den ken mi a konfia, kende a kome mi pan, a lanta su hilchi kontra mi.

41:10 Ma Abo, O SEÑOR, tene miserikòrdia di mi i lantami, pa mi paga nan bèk.

41:11 Asina lo mi sa ku Bo ta kontentu ku mi, pasobra mi enemigu no ta kanta viktoria riba mi.

41:12 Ma pa loke t'ami, Bo ta sostenémi den mi integridat, i Bo ta ponemi den Bo presensia pa semper.

41:13 Bendishoná sea SEÑOR, e Dios di Israel, for di etèrnidat te na etèrnidat. Amèn i Amèn.n BUKI IIr Salmo 42-72