Salmonan 38

BSNP Edita

Salmonan 38

38:1 O SEÑOR, no reprendémi den Bo furia, ni kastigámi den Bo rabia ardiente.

38:2 Pasobra Bo flechanan a drenta profundamente den mi, i Bo man a baha pisá riba mi.

38:3 No tin nada salú den mi karni pa motibu di Bo indignashon; no tin sosiegu den mi wesunan pa motibu di mi piká.

38:4 Pasobra mi inikidatnan a pasa riba mi kabes; manera un karga pisá nan ta pisa muchu pa mi.

38:5 Mi yaganan ta hole malu; nan ta yen di pus pa motibu di mi lokura.

38:6 Mi ta doblá, tur doblá te na suela; henter dia mi ta kana bistí na rou.

38:7 Pasobra mi lomo ta yen di inflamashon; i no tin nada salú den mi karni.

38:8 Mi ta agotá i mashá kibrá; mi ta keha pa motibu di e inkietut di mi kurason.

38:9 Señor, tur mi deseo ta Bo dilanti; i mi suspiro no ta skondí pa Bo.

38:10 Mi kurason ta bati duru, mi forsa ta fayami; i e lus di mi wowo, asta esei a bai lagami.

38:11 Mi stimánan i mi amigunan ta hala leu for di mi plaga; i mi famianan ta keda para leu.

38:12 Esnan ku ta buska mi bida ta pone trampa pa mi; i esnan ku kier trese maldat riba mi ta papia di destrukshon; i henter dia nan ta plania traishon.

38:13 Ma ami, manera un hende sordo, mi no ta tende; i mi ta manera un hende mudo ku no ta habri su boka.

38:14 Sí, mi ta manera un hende ku no ta tende, i den kende su boka no tin argumento.

38:15 Pasobra mi ta spera riba Bo, O SEÑOR; Abo lo kontestá, O Señor mi Dios.

38:16 Pasobra mi a bisa: "Ohalá ku nan lo no gosa i harimi, ku ora mi pia slep nan no halsa nan mes kontra mi."

38:17 Pasobra mi ta serka di kai, i mi pena ta kontinuamente mi dilanti.

38:18 Pasobra mi ta konfesá mi inikidat; mi ta yen di angustia pa motibu di mi piká.

38:19 Ma mi enemigunan ta bibu i fuerte; i hopi ta esnan ku ta odiami sin motibu.

38:20 I esnan ku ta paga bon ku malu, nan ta kontra mi, pasobra mi ta sigui loke ta bon.

38:21 No bandonámi, O SEÑOR; O mi Dios, no keda leu for di mi!

38:22 Pura pa yudami, O Señor, mi salbashon!

Salmonan 37 Salmonan 39