Salmonan 35

BSNP Edita

Salmonan 35

35:1 Defendémi, O SEÑOR, kontra esnan ku ta pleita ku mi; bringa ku esnan ku ta bringa ku mi.

35:2 Kohe eskudo grandi i chikitu, i lanta pa yudami.

35:3 Saka tambe lansa i hacha di guera kontra esnan ku ta pèrsiguími; bisa mi alma: "Ami ta bo salbashon."

35:4 Laga esnan ku ta buska mi alma keda brongosá i desonrá; laga esnan ku ta plania maldat kontra mi hal'atras i keda umiyá.

35:5 Laga nan ta manera bagas dilanti di bientu, i laga e Angel di SEÑOR kore ku nan.

35:6 Laga nan kaminda ta skur i lebelebe, i laga e Angel di SEÑOR pèrsiguí nan.

35:7 Pasobra sin motibu nan a skonde nan reda pa mi; sin motibu nan a koba un buraku pa mi alma.

35:8 Laga destrukshon bin riba djé sin ku e ripará; laga e reda ku el a skonde, kohe é mes; i lagu'é kai den e mesun destrukshon ei.

35:9 I mi alma lo alegrá den SEÑOR, i lo regosihá den Su salbashon.

35:10 Tur mi wesunan lo bisa: "SEÑOR, ken ta manera Bo, Kende ta libra esun afligí for di esun ku ta mas fuerte kuné, i esun afligí i esun den nesesidat for di esun ku ta plùnder é?"

35:11 Testigunan malisioso ta lanta; nan ta puntrami tokante di kosnan ku mi no sa.

35:12 Nan ta pagami malu pa bon, i ta laga mi alma tristu.

35:13 Ma pa loke t'ami, tempu ku nan tabata malu, mi bistí tabata paña-di-saku; mi a umiyá mi alma ku yunamentu; i mi orashon a bolbe bèk na mi mes kurason.

35:14 Mi a komportámi komo un amigu, komo un ruman; mi a bùig te na suela, bistí tur na pretu, manera un hende ku ta na rou pa su mama.

35:15 Ma ora mi a trompeká nan a regosihá i a reuní huntu; e atversarionan ku mi no tabata konosé a sera kabes kontra mi; nan a kalumniámi sin fin.

35:16 Manera bofonadónan profano na un fiesta, nan a sera djente kontra mi.

35:17 Señor, kuantu tempu mas lo Bo para mira? Reskatá mi alma for di nan destrukshonnan, mi úniko bida for di leonnan.

35:18 Lo mi dunaBo gradisimentu den e kongregashon grandi; lo mi alabáBo meimei di un multitut enorme.

35:19 No laga esnan ku sin motibu ta mi enemigu, harimi; ni laga esnan ku sin motibu ta odiami, wak mi ku mal wowo.

35:20 Pasobra nan no ta papia di pas, ma kontra esnan ku ta biba trankil na e tera nan ta inventá palabranan engañoso.

35:21 I nan a habri asina un boka grandi kontra mi; nan a bisa: "Ahá, ahá, nos mes wowo a mira esei!"

35:22 Bo a mira esei, O SEÑOR, no keda ketu; O Señor, no keda leu for di mi.

35:23 Spièrta i lanta na mi defensa, defendé mi kaso, mi Dios i mi Señor.

35:24 Huzgami, O SEÑOR mi Dios, segun Bo hustisia; i no laga nan harimi.

35:25 No laga nan bisa den nan kurason: "Ahá! Nos deseo!" No laga nan bisa: "Nos a tragu'é!"

35:26 Laga esnan ku ta gosa di mira mi angustia keda brongosá i konhuntamente umiyá; laga esnan ku ta halsa nan mes riba mi keda bistí ku bèrguensa i desonor.

35:27 Laga esnan ku ta kontentu ku mi kaso hustu grita di alegria i regosihá; laga nan bisa kontinuamente: "SEÑOR sea engrandesí, esun ku tin delisia den e prosperidat di Su sirbidó."

35:28 I mi lenga lo deklará Bo hustisia, i Bo alabansa henter dia.

Salmonan 34 Salmonan 36