Salmonan 34

BSNP Edita

34:1 Lo mi bendishoná SEÑOR den tur tempu; Su alabansa lo ta kontinuamente den mi boka.

34:2 Mi alma lo gloria den SEÑOR; e umildenan lo tende i regosihá.

34:3 O engrandesé SEÑOR ku mi, i laga nos halsa Su nòmber huntu.

34:4 Mi a buska SEÑOR, i El a kontestámi, i a librami for di tur mi temornan.

34:5 Nan a hisa kara mira na djE i a keda radiante, i nunka nan kara lo keda na bèrguensa.

34:6 E pober hende aki a sklama i SEÑOR a tend'é, i a salb'é for di tur su angustianan.

34:7 E Angel di SEÑOR ta kampa rònt di esnan ku ta tem'E, i ta reskatá nan.

34:8 O purba i mira ku SEÑOR ta bon; bendishoná ta e hende ku ta tuma refugio den djE!

34:9 O teme SEÑOR, boso Su santunan, pasobra esnan ku ta tem'E no tin falta di nada.

34:10 Leon chikitu sí tin nesesidat i ta pasa hamber, ma esnan ku ta buska SEÑOR lo no tin falta di ningun kos bon.

34:11 Bin, yunan, skuchami; lo mi siña boso e temor di SEÑOR.

34:12 Ta ken ta e hende ku ta deseá bida, i ta stima bida largu, pa e por mira bondat?

34:13 Warda bo lenga di maldat, i bo lepnan di papia engaño.

34:14 Apartá bo mes for di maldat i hasi bon; buska pas i siguié.

34:15 E wowonan di SEÑOR ta riba e hustunan, i Su oreanan ta atento pa skucha nan sklamashon.

34:16 E kara di SEÑOR ta kontra hasidónan di maldat, pa kòrta e rekuèrdo di nan kita for di riba tera.

34:17 E hustunan ta sklama i SEÑOR ta tende, i ta libra nan for di tur nan angustianan.

34:18 SEÑOR ta serka di e hende di kurason kibrá, i ta salba esnan di spiritu abatí.

34:19 Hopi ta e aflikshonnan di e hustu, ma SEÑOR ta libr'é for di nan tur.

34:20 E ta kuida tur su wesunan; ningun di nan no ta wòrdu kibrá.

34:21 Maldat ta mata e malbado; i esnan ku ta odia e hustu lo wòrdu kondená.

34:22 SEÑOR ta redimí alma di Su sirbidónan; i ningun di esnan ku ta tuma refugio den djE lo no wòrdu kondená.