Proverbionan 31

BSNP Edita

31:1 Palabranan di rei Lemuel, e dichonan ku su mama a siñ'é.

31:2 Kiko, mi yu? I kiko, yu di mi mondongo? I kiko, yu di mi promesanan?

31:3 No gasta bo forsa ku muhé, ni bo vigor ku esnan ku ta destruí reinan.

31:4 No ta pas pa reinan, O Lemuel, no ta pas pa reinan bebe biña, ni pa gobernantenan deseá bibida stèrki,

31:5 pa nan no bebe i lubidá lei, i trose derecho di tur e afligínan.

31:6 Duna bibida stèrki na esun ku ta peresé, i biña na esun ku su kurason ta amargá.

31:7 Lagu'é bebe i lubidá su pobresa, i no kòrda su miseria mas.

31:8 Habri bo boka pa e mudo, pa derecho di tur esnan desafortuná.

31:9 Habri bo boka, huzga ku hustisia, i defendé derecho di e pober i di hende den nesesidat.

31:10 Un muhé birtuoso, ken por hañ'é? Pasobra é bal muchu mas ku rubí.

31:11 Kurason di su esposo ta konfia den djé, i su esposo lo no tin falta di ganashi.

31:12 E ta hasi bon na su esposo, i no malu, tur e dianan di su bida.

31:13 E ta buska lana i lino, i ku gustu e ta traha ku su mannan.

31:14 E ta manera barkunan di komersiante; e ta trese su kuminda for di leu.

31:15 E ta lanta mientras ta nochi ainda, i ta duna kuminda na su famia, i tarea na su sirbientenan.

31:16 E ta inspektá un tereno, i ta kumpr'é; for di su ganashi e ta planta un kunuku di wendrùif.

31:17 E ta faha su hep ku fortalesa, i ta fortalesé su brasanan.

31:18 E ta ripará ku su negoshi ta bai bon; anochi su lampi no ta paga.

31:19 E ta tene e karete-pa-hila den su man, i su dedenan ta gara e spul.

31:20 E ta habri su man pa e pober, i ta ekstendé su man na esun den nesesidat.

31:21 E no tin miedu di sneu pa su famia, pasobra henter su famia ta bistí na skarlata.

31:22 E ta traha ko'i tapa pa pone riba su kama; su bistí ta di paña di lino fini i púrpura.

31:23 Su esposo ta konosí den e portanan di stat, ora ku e sinta entre e ansianonan di e pais.

31:24 E ta traha paña-di-bisti di tela di lino, i ta bende nan, i ta entregá faha na e komersiantenan.

31:25 Fortalesa i dignidat ta su bistí, i ku alegria e ta spera e porvenir.

31:26 E ta habri su boka ku sabiduria, i siñansa kariñoso ta riba su lenga.

31:27 E ta tene e kamindanan di su famia bon na bista, i no ta kome pan di flohedat.

31:28 Su yunan ta lanta i ta yam'é bendishoná; su esposo tambe, i e ta gab'é, bisando:

31:29 "Tin hopi yu muhé ku a hasi bon, ma abo ta surpasá nan tur."

31:30 Ser atraktivo ta engañoso i bunitesa ta banidat, ma un muhé ku ta teme SEÑOR, esei lo wòrdu elogiá.

31:31 Dun'é di e fruta di su mannan, i laga su mes obranan gab'é den e portanan di stat.