Nehemias 6
6:1
Awor a sosodé ku ora Sanbalat, Tobias, Gesem e arabir i e restu di nos enemigunan a haña sa ku mi a bolbe lanta e muraya, i ku no a keda ningun buraku den djé--ounke ku na e tempu ei ainda mi no a pone e portanan den e entradanan--
6:2
Sanbalat i Gesem a manda bisami: "Ban, laga nos reuní huntu na un di e pueblitonan den e sabana di Ono." Ma nan tabatin plan di hasimi daño.
6:3
Asina mi a manda mensaheronan serka nan, bisando: "Mi ta hasiendo un gran trabou i mi no por bin. Pakiko e trabou mester stòp mientras ku mi ta lagu'é pa bin serka boso?"
6:4
I kuater biaha nan a manda mensaheronan serka mi na e manera aki, i mi a kontestá nan na e mesun manera.
6:5
E ora ei, pa di sinku biaha, Sanbalat a manda su sirbidó serka mi na e mesun manera, ku un karta habrí den su man.
6:6
Den djé tabata pará skirbí: "Tin rumor ta kore entre e nashonnan, i Gasmu ta bisa ku abo i e hudiunan tin plan di rebeldiá; ta pesei boso ta bolbe lanta e muraya. I segun e rumornan aki abo ta bai bira nan rei.
6:7
Tambe bo a nombra profetanan pa proklamá na Jerusalèm tokante di bo: 'Tin un rei na Juda!' I awor rei lo haña sa di e rumornan aki. Pesei, bin awor; laga nos deliberá huntu."
6:8
Anto mi a manda bis'é: "Kosnan asin'aki manera bo ta bisa no ta sosodé. Ma ta bo mes kurason ta inventá nan."
6:9
Pasobra nan tur tabata trata di spanta nos, bisando: "Nan lo wòrdu deskurashá den e trabou i e trabou lo no wòrdu hasí." Ma awor, O Dios, fortalesé mi mannan.
6:10
I ora mi a drenta kas di Semaias, yu hòmber di Delaia, yu hòmber di Mehetabel, kende tabata será den kas, el a bisa: "Laga nos reuní den e kas di Dios, den e tèmpel, i laga nos sera e portanan di tèmpel, pasobra nan ta bin pa matabo, i nan ta bin anochi pa matabo."
6:11
Ma mi a kontestá: "Un hòmber manera ami mester hui? I un hende manera ami por bai den tèmpel pa skapa su bida? Mi no ta bai paden."
6:12
E ora ei mi a komprendé ku siguramente Dios no a mand'é, sino ku el a papia e profesia aki kontra mi, pasobra Tobias i Sanbalat a kontrat'é.
6:13
Pa e motibu aki e tabata kontratá, pa mi haña miedu i aktua asina, i hasi piká, asina ku nan por a haña un mal rapòrt di mi, pa nan por ponemi na bèrguensa.
6:14
O mi Dios, kòrda riba Tobias i Sanbalat segun e echonan aki di nan, i tambe Noadias, e profeta muhé, i sobrá di e profetanan ku tabata trata di spantami.
6:15
Asina e muraya a keda kla riba e di bint'i sinku dia di luna di Elul, den sinkuent'i dos dia.
6:16
I ora tur nos enemigunan a tende esaki i tur e nashonnan rònt di nos a mira esaki, nan a pèrdè ánimo, pasobra nan a rekonosé ku e trabou aki a wòrdu kumplí ku e yudansa di nos Dios.
6:17
Tambe den e dianan ei e nobelnan di Juda a manda hopi karta pa Tobias, i e kartanan di Tobias a bin pa nan.
6:18
Pasobra hopi hende na Juda tabata ligá na djé pa medio di huramentu, pasobra e tabata yerno di Sekanias, yu hòmber di Ara, i su yu hòmber Johanan a kasa ku yu muhé di Mesulam, yu hòmber di Berekias.
6:19
Ademas, nan tabata papia den mi presensia di su bon obranan i tabata bis'é loke mi a papia. Anto Tobias a manda karta pa spantami.