Nehemias 5
5:1
Awor tabatin un gran klamor di e pueblo i di nan esposanan kontra nan rumannan hudiu.
5:2
Pasobra tabatin esnan ku tabata bisa: "Nos mes, nos yu hòmbernan i nos yu muhénan, ta hopi; pesei, laga nos buska mainshi pa nos kome i keda na bida."
5:3
I tabatin otronan ku tabata bisa: "Nos a hipoteká nos terenonan, nos kunukunan di wendrùif i nos kasnan pa nos haña mainshi pa motibu di e hamber."
5:4
Tambe tabatin esnan ku tabata bisa: "Nos a fia plaka riba nos terenonan i nos kunukunan di wendrùif, pa paga belasting di rei.
5:5
I awor nos karni ta meskos ku karni di nos rumannan, nos yunan meskos ku nan yunan. I mira, nos ta fòrsa nos yu hòmbernan i nos yu muhénan pa ta esklabu, i algun di nos yu muhénan ta esklabu kaba, i nos no por hasi nada pa motibu ku nos terenonan i nos kunukunan di wendrùif ta pertenesé na otro hende."
5:6
I mi a rabia masha tantu mes ora mi a tende nan klamor i e palabranan aki.
5:7
Anto mi a pensa e kos bon i a akusá e nobelnan i e gobernantenan i a bisa nan: "Boso ta eksigí fiamentu ku interes, kada un for di su ruman!" Pesei mi a yama un asamblea grandi kontra nan.
5:8
I mi a bisa nan: "Te asina leu ku nos tabata por, nos a redimí nos rumannan hudiu ku a wòrdu bendí ku e nashonnan. Awor, boso ta bai bende boso rumannan pa nan wòrdu bendí ku nos?" Anto nan a keda ketu i no tabata por a kontestá nada.
5:9
Atrobe mi a bisa: "Loke boso ta hasi no ta bon. No t'asina ku boso mester kana den e temor di nos Dios pa motibu di e reproche di e nashonnan, nos enemigunan?
5:10
I na mes manera ami, mi ruman hòmbernan i mi sirbidónan ta fia e pueblo plaka i mainshi. Pa fabor, laga nos pone un fin na e fiamentu ku interes aki.
5:11
Pa fabor, duna nan nan terenonan, nan kunukunan di wendrùif, nan hòfinan di oleifi i nan kasnan bèk awe mes, tambe e di shen parti di e plaka i di e mainshi, e biña nobo i e zeta ku boso ta eksigí for di nan."
5:12
Anto nan a bisa: "Nos lo debolbé esaki i lo no eksigí nada for di nan. Nos lo hasi eksaktamente manera bo ta bisa." Asina mi a yama e saserdotenan i a pone nan bou di huramentu, ku nan lo hasi segun e promesa aki.
5:13
Tambe mi a sakudí e parti-dilanti di mi paña i a bisa: "Ku asin'aki Dios sakudí tur hòmber saka for di su kas i for di su propiedatnan, kendenan no ta kumpli ku e promesa aki. I ku asin'aki e keda sakudí i bashí." I henter e asamblea a bisa: "Amèn!" I nan a alabá SEÑOR. Anto e pueblo a hasi segun e promesa aki.
5:14
Ademas, for di e dia ku mi a keda nombrá komo nan gobernadó na tera di Juda, for di e di binti aña te na e di trint'i dos aña di rei Artaherhes, pa diesdos aña, ni ami ni mi rumannan no a kome kuminda di gobernadó.
5:15
Ma e gobernadónan di antes, ku tabata promé ku mi, a pone karga riba e pueblo, i nan a tuma pan i biña for di nan, fuera di kuarenta siklo di plata. Asta nan sirbidónan tabata dominá e pueblo. Ma ami no a hasi asina, pa motibu di e temor di Dios.
5:16
I tambe mi a keda riba e trabou di e muraya aki. Nos no a kumpra ningun tereno, i tur mi sirbidónan a reuní ayanan pa e trabou.
5:17
Ademas, na mi mesa tabatin shent'i sinkuenta hudiu i ofisial, fuera di esnan ku a bin serka nos for di e nashonnan ku tabata rònt di nos.
5:18
Awor loke a wòrdu prepará pa kada dia tabata un buey i seis karné di e mihónan ku tin. Tambe nan a prepará parhanan pa mi. I un biaha den kada dies dia nan tabata proveé tur sorto di biña na abundansia. Tòg, ku tur esaki mi no a eksigí kuminda di gobernadó, pasobra e trabou fòrsá tabata pisá riba e pueblo aki.
5:19
Kòrda di mi, O mi Dios, pa bon, segun tur loke mi a hasi pa e pueblo aki.