Nehemias 2
2:1
I a sosodé ku den luna di Nisan, den e di binti aña di rei Artaherhes, ora tabatin biña su dilanti, mi a kohe e biña i a duna rei esaki. I te awor aki nunka mi no tabata tristu den su presensia.
2:2
Pesei rei a bisami: "Pakiko bo kara ta tristu ounke ku bo no ta malu? Esaki no ta nada otro sino tristesa di kurason." E ora ei mi a haña masha miedu.
2:3
I mi a bisa rei: "Ku rei biba pa semper. Pakiko mi kara lo no ta tristu ora ku e stat, e lugá di e tumbanan di mi tatanan, ta keda desolá i su portanan a wòrdu destruí pa kandela?"
2:4
E ora ei rei a bisami: "Kiko ta bo petishon?" Asina mi a hasi orashon na e Dios di shelu.
2:5
I mi a bisa rei: "Si ta agradá rei, i si bo sirbidó a haña grasia bo dilanti, mandami Juda, na e stat di e tumbanan di mi tatanan, pa mi rekonstruié."
2:6
E ora ei rei a bisami, ku e reina sintá banda di djé: "Kuantu tempu bo biahe ta bai dura, i ki dia bo ta bolbe?" Asina a agradá rei di mandami, i mi a dun'é un tempu definitivo.
2:7
I mi a bisa rei: "Si ta agradá rei, dunami kartanan pa e gobernadónan di e provinsianan na e otro banda di Riu Eufrates, pa nan lagami pasa te ora mi yega Juda,
2:8
i un karta pa Asaf, e wardadó di e mondi-será di rei, pa e dunami palu pa traha balki pa e portanan di e fòrti ku ta keda banda di e tèmpel, pa e muraya di stat i pa e kas kaminda mi ta bai." I rei a dunami nan, pasobra e bon man di mi Dios tabata riba mi.
2:9
E ora ei mi a bai serka e gobernadónan di e provinsianan na e otro banda di Riu Eufrates i a duna nan e kartanan di rei. Awor rei a manda ofisialnan di e ehérsito i koredónan di kabai huntu ku mi.
2:10
I ora Sanbalat e horonita i Tobias e ofisial amonita a tende esaki, esaki a desagradá nan mashá ku un hende a bin pa buska e bienestar di e yunan di Israel.
2:11
Asina mi a yega Jerusalèm i a keda tres dia ayanan.
2:12
I den anochi mi a lanta, ami ku algun hòmber huntu ku mi. Mi no a bisa ningun hende kiko mi Dios a pone den mi kurason pa hasi pa Jerusalèm; i no tabatin ningun bestia huntu ku mi, ku eksepshon di e bestia ku mi tabata kore ariba.
2:13
Asina mi a sali bai den anochi na e Porta di Vaye den direkshon di e Pos di Dragon, i na e Porta di Mèst, i a inspektá e murayanan di Jerusalèm ku a wòrdu bashá abou i su portanan ku a keda destruí pa kandela.
2:14
Despues mi a sigui te na e Porta di Fuente i e Tanki di Awa di Rei, ma no tabatin lugá pa e bestia ku mi tabata kore ariba pasa.
2:15
Asina ta ku anochi mi a pasa dor di e vaye bai ariba i a inspektá e muraya. Despues mi a bolbe drenta e Porta di Vaye i a bin bèk.
2:16
I e ofisialnan no tabata sa unda mi a bai ni kiko mi a hasi; te ainda mi no a bisa e hudiunan, e saserdotenan, e nobelnan, e ofisialnan, ni e otronan ku tabata hasi e trabou.
2:17
E ora ei mi a bisa nan: "Boso ta mira e situashon malu ku nos ta den, ku Jerusalèm ta keda desolá i su portanan kimá pa kandela. Ban, laga nos rekonstruí e muraya di Jerusalèm, pa nos no ta un reproche mas."
2:18
I mi a konta nan kon e man di mi Dios tabata bon riba mi, i tambe tokante di e palabranan di rei ku el a papia ku mi. E ora ei nan a bisa: "Laga nos lanta i traha." Asina nan a pone man na e bon trabou.
2:19
Ma ora Sanbalat e horonita, Tobias e ofisial amonita i Gesem e arabir a tende esaki, nan a hasi bofon di nos i a despresiá nos i a bisa: "Kiko e kos aki ku boso ta hasi ta? Ta kontra rei boso ta rebeldiá?"
2:20
Asina mi a kontestá nan i a bisa nan: "E Dios di shelu lo duna nos éksito; pesei nos, Su sirbidónan, lo lanta i traha, ma boso no tin ni parti, ni derecho, ni memoria na Jerusalèm."