Mateo 7

BSNP Edita

Mateo 7

7:1 "No huzga, pa boso no wòrdu huzgá.

7:2 Pasobra di e mesun manera ku boso huzga, boso lo wòrdu huzgá; i ku e mesun midí ku boso midi, lo wòrdu midí pa boso tambe.

7:3 "I pakiko bo ta wak e stòf den wowo di bo ruman, ma no ta ripará e balki ku tin den bo mes wowo?

7:4 Of kon bo por bisa bo ruman: 'Lagami saka e stòf for di bo wowo,' i mira, e balki no ta den bo mes wowo?

7:5 Abo, hipokrít, saka promé e balki for di bo mes wowo, i e ora ei lo bo mira bon kla pa saka e stòf for di wowo di bo ruman.

7:6 "No duna kachó loke ta santu, ni tira boso pèrlanan pa porko, pa nan no trapa nan ku nan pia, i nan bira sker boso na pida-pida.

7:7 "Pidi, i lo wòrdu duná na boso; buska, i boso lo haña; bati, i lo wòrdu habrí pa boso.

7:8 Pasobra ken ku pidi ta risibí, i esun ku buska ta haña, i pa esun ku bati lo wòrdu habrí.

7:9 "Of kual di boso, si su yu hòmber pidié pan, lo dun'é un piedra?

7:10 Of si e pidi piská, lo e dun'é un kolebra?

7:11 Si boso anto, siendo malbado, sa di duna boso yunan loke ta bon, kuantu mas boso Tata ku ta den shelu lo duna loke ta bon na esnan ku pidiE!

7:12 Pesei, tur loke boso kier pa hende hasi pa boso, hasi meskos pa nan, pasobra esaki ta e Lei i e Profetanan.

7:13 "Drenta dor di e porta smal, pasobra hanchu ta e porta i espasioso e kaminda ku ta hiba na destrukshon, i hopi ta esnan ku ta drenta dor di djé.

7:14 Pasobra chikitu ta e porta i smal e kaminda ku ta hiba na bida, i poko ta esnan ku ta hañ'é.

7:15 "Tene kuidou ku profeta falsu, ku ta bin serka boso bistí manera karné, ma di paden nan ta lobo hambrá.

7:16 Na nan fruta boso lo konosé nan. Hende sa kita wendrùif for di mata di sumpiña anto, òf figo for di bringamosa?

7:17 Asina tur bon palu ta duna bon fruta; ma e palu malu ta duna mal fruta.

7:18 Un bon palu no por duna mal fruta, ni un palu malu no por duna bon fruta.

7:19 Tur palu ku no ta duna bon fruta ta wòrdu gekap i tirá den kandela.

7:20 Asina anto, na nan fruta boso lo konosé nan.

7:21 "No ta tur hende ku bisaMi: 'Señor, Señor,' lo drenta e reino di shelu; ma esun ku hasi e boluntat di Mi Tata ku ta den shelu.

7:22 Hopi lo bisaMi den e dia ei: 'Señor, Señor, nos no a profetisá den Bo nòmber, i den Bo nòmber a saka demoño, i den Bo nòmber a hasi hopi milager?'

7:23 E ora ei lo Mi deklará na nan: 'Nunka Mi no a konosé boso; bai for di Mi, boso ku ta hasi inikidat.'

7:24 "Pesei, ken ku tende e palabranan aki di Mi, i hasi nan, lo wòrdu kompará ku un hòmber sabí ku a traha su kas riba baranka.

7:25 I awaseru a kai, diluvionan a bin, i bientunan a supla, i a suta duru kontra e kas ei; i tòg e no a kai, pasobra e tabata fundá riba baranka.

7:26 I ken ku tende e palabranan aki di Mi, i no hasi nan, lo ta manera un hòmber bobo ku a traha su kas riba santu.

7:27 I awaseru a kai, diluvionan a bin, i bientunan a supla, i a suta duru kontra e kas ei; i el a kai, i su kaída tabata grandi."

7:28 I a sosodé ku ora Jesus a kaba di papia e palabranan aki, e multitutnan a keda asombrá di Su siñansa;

7:29 pasobra E tabata siña nan manera un hende ku tin outoridat, i no manera nan eskribanan.

Mateo 6 Mateo 8