Mateo 13

BSNP Edita

Mateo 13

13:1 E dia ei Jesus a sali for di e kas i tabata sintá kantu di laman.

13:2 I multitutnan grandi a bin para tur rònt di djE, asina ku El a bai sinta den un boto, i henter e multitut a keda para kantu di laman.

13:3 I El a papia hopi kos ku nan pa medio di parábola, bisando: "Mira, e sembradó a sali pa sembra.

13:4 I segun ku e tabata sembra, algun simia a kai kantu di kaminda, i e parhanan a bin i a kome nan.

13:5 I otronan a kai den lugánan yen di piedra, kaminda no tabatin muchu tera; i nan a nase mesora, pasobra no tabatin tera hundu.

13:6 Ma ora solo a sali, nan a kima; i pasobra nan no tabatin rais, nan a seka.

13:7 I otronan a kai meimei di mata di sumpiña, i e matanan di sumpiña a krese i a hoga nan.

13:8 I otronan a kai den bon tera i a duna kosecha; algun a duna shen, algun sesenta i algun trinta bes mas tantu.

13:9 Esun ku tin orea, lagu'é tende."

13:10 I e disipelnan a bin i a puntr'E: "Pakiko Bo ta papia ku nan pa medio di parábola?"

13:11 I El a kontestá i a bisa nan: "Pasobra na boso a wòrdu duná pa konosé e misterionan di e reino di shelu, ma na nan esei no a wòrdu duná.

13:12 Pasobra na ken ku tin, mas lo wòrdu duná, i e lo tin na abundansia; ma ken ku no tin, asta loke e tin lo wòrdu kitá for di djé.

13:13 Pesei Mi ta papia ku nan pa medio di parábola: 'Pasobra mirando, nan no ta mira, i tendiendo, nan no ta tende, ni nan no ta komprendé.'

13:14 I den nan kaso ta wòrdu kumplí e profesia di Isaias, kual ta bisa: 'Boso lo sigui tende, ma lo no komprendé; i boso lo sigui mira, ma lo no ripará;

13:15 pasobra kurason di e pueblo aki a bira insensitivo, i ku nan orea apenas nan ta tende, i nan a sera nan wowo, pa nan no mira ku nan wowo, i tende ku nan orea, i komprendé ku nan kurason i kombèrtí, i Ami kura nan.'

13:16 Ma bendishoná ta boso wowonan, pasobra nan ta mira; i boso oreanan, pasobra nan ta tende.

13:17 Pasobra di bèrdat Mi ta bisa boso, ku hopi profeta i hòmber hustu a deseá di mira loke boso ta mira, i nan no a mira; i di tende loke boso ta tende, i nan no a tende.

13:18 "Boso tende anto e parábola di e sembradó.

13:19 Si un hende tende e palabra di e reino i no komprendé esaki, e malbado ta bin i ta ranka loke a wòrdu sembrá den su kurason bai kuné. Esaki ta esun ku simia a wòrdu sembrá riba djé kantu di kaminda.

13:20 I esun ku simia a wòrdu sembrá riba djé den lugánan yen di piedra ta e hende ku ta tende e palabra i mesora ta risibié ku goso;

13:21 sinembargo, e no tin rais den su mes, ma e ta temporario; i ora surgi aflikshon òf pèrsekushon pa kousa di e palabra, mesora e ta trompeká.

13:22 I esun ku simia a wòrdu sembrá riba djé meimei di mata di sumpiña ta e hende ku ta tende e palabra, i e preokupashonnan di e mundu aki i e engaño di rikesa ta hoga e palabra, i e ta keda sin duna fruta.

13:23 Ma esun ku simia a wòrdu sembrá riba djé den bon tera ta e hende ku ta tende e palabra i ta komprendé, ku di bèrdat ta duna fruta tambe i ta produsí, algun shen bes, otro sesenta i otro trinta bes mas tantu."

13:24 El a konta nan un otro parábola, bisando: "E reino di shelu por wòrdu kompará ku un hende ku a sembra bon simia den su kunuku.

13:25 Ma mientras ku hende tabata drumi, su enemigu a bin, a sembra simia di yerba shimaron den e trigo i a kohe su kaminda bai.

13:26 I ora ku e trigo a spreit i a forma tapushi, e yerba shimaron tambe a keda bisto.

13:27 "I e esklabunan di e doño di kunuku a bin bis'é: 'Señor, no ta bon simia bo a sembra den bo kunuku? Di kon anto tin yerba shimaron aden?'

13:28 "I el a bisa nan: 'Ta un enemigu a hasi esaki!' "I e esklabunan a puntr'é: 'Bo kier anto pa nos bai i rekohé nan?'

13:29 "Ma el a kontestá: 'Nò, pa no sosodé ku mientras boso ta rekohé e yerba shimaron, boso ranka e trigo tambe huntu kuné.

13:30 Laga tur dos krese huntu te na kosecha; i na tempu di kosecha lo mi bisa e kosechadónan: "Rekohé e yerba shimaron promé i mara nan na bòshi pa kima nan; ma rekohé e trigo warda den mi mangasina."'"

13:31 El a konta nan un otro parábola, bisando: "E reino di shelu ta manera un simia di mòster ku un hòmber a kohe i a sembra den su kunuku;

13:32 i esaki ta mas chikitu ku tur otro simia; ma ora ku e kaba di krese e ta mas grandi ku e matanan di hòfi, i e ta bira un palu grandi, asina ku e parhanan di shelu ta bin traha neishi den su ramanan."

13:33 El a konta nan un otro parábola: "E reino di shelu ta manera zürdeg ku un muhé a kohe i a skonde den tres midí di hariña, te ora ku esaki a bira kompletamente zür."

13:34 Tur e kosnan aki Jesus a papia ku e multitutnan pa medio di parábola, i E no a papia nada ku nan sin uza parábola,

13:35 pa por a keda kumplí loke a wòrdu anunsiá dor di e profeta, kende a bisa: "Lo Mi habri Mi boka den parábola; lo Mi konta kosnan ku a keda skondí desde e fundashon di mundu."

13:36 E ora ei El a bai laga e multitutnan i a bai den e kas. I Su disipelnan a bin serka djE, bisando: "Splika nos e parábola di e yerba shimaron den e kunuku."

13:37 I El a kontestá i a bisa: "Esun ku ta sembra e bon simia ta e Yu di Hende,

13:38 i e kunuku ta e mundu; e bon simia ta e yunan di e reino, i e yerba shimaron ta e yunan di e malbado;

13:39 e enemigu ku a sembra nan ta diabel i e kosecha ta e fin di mundu; i e kosechadónan ta angelnan.

13:40 "Pesei, meskos ku e yerba shimaron ta wòrdu rekohí i kimá den kandela, asina lo sosodé na e fin di mundu.

13:41 E Yu di Hende lo manda Su angelnan, i nan lo rekohé for di Su reino tur piedra di trompeká, i esnan ku ta hasi inikidat,

13:42 i lo tira nan den e fòrnu di kandela; den e lugá ei lo tin yoramentu i mordementu riba djente.

13:43 E ora ei e hustunan lo briya manera solo den e reino di nan Tata. Esun ku tin orea, lagu'é tende.

13:44 "E reino di shelu ta manera un tesoro skondí den un kunuku, kual un hende a haña i a skonde; i yen di goso pa motibu di esei e ta bai i ta bende tur loke e tin, i ta kumpra e kunuku ei.

13:45 "Tambe e reino di shelu ta manera un komersiante ku ta buska pèrla bunita,

13:46 i ora ku el a haña un pèrla di gran balor el a bai i a bende tur loke e tabatin i a kumpr'é.

13:47 "Tambe e reino di shelu ta manera un reda tirá den laman, ku ta kohe tur sorto di piská;

13:48 i ora ku e tabata yen, nan a hal'é trese na kantu, i nan a kai sint'abou i a rekohé e bon piskánan warda nan den barí, ma esnan malu nan a tira afó.

13:49 Asina lo ta na e fin di mundu; e angelnan lo bin i separá e malbadonan for di meimei di e hustunan,

13:50 i lo tira nan den e fòrnu di kandela. Lo tin yoramentu i mordementu riba djente.

13:51 "Boso a komprendé tur e kosnan aki?" Nan a bis'E: "Sí."

13:52 I El a bisa nan: "Pesei tur eskriba ku bira disipel di e reino di shelu ta manera un kabes di kas, ku ta saka for di su tesoro kosnan nobo i bieu."

13:53 I a sosodé ku ora Jesus a kaba di papia e parábolanan aki, El a bai for di einan.

13:54 I ora ku El a yega na Su mes stat, El a kuminsá siña nan den nan snoa, asina ku nan a keda asombrá i a bisa: "For di unda e hòmber aki a haña e sabiduria aki i e podernan pa hasi milager?

13:55 No ta yu di e karpinté esaki ta? No ta Maria Su mama yama, i Su rumannan: Santiago, Jose, Simon i Judas?

13:56 I Su ruman muhénan tur no ta aki serka nos? For di unda anto e hòmber aki a haña tur e kosnan aki?"

13:57 I nan a sinti nan mes ofendí pa Su motibu. Ma Jesus a bisa nan: "Un profeta ta wòrdu onrá tur parti, menos na su mes stat i den su mes kas."

13:58 I E no a hasi hopi milager einan pa motibu di nan inkredulidat.

Mateo 12 Mateo 14