Marko 13

BSNP Edita

Marko 13

13:1 I ora ku E tabata sali for di tèmpel, un di Su disipelnan a bis'E: "Maestro, mira ki piedranan i ki edifisionan grandi!"

13:2 I Jesus a kontest'é: "Bo ta mira e edifisionan grandi aki? Ni un piedra lo no keda riba otro ku lo no wòrdu bashá abou."

13:3 I ora ku E tabata sintá riba Seru di Oleifi enfrente di e tèmpel, Pedro, Santiago, Juan i Andres tabata puntr'E ora nan tabata nan so kunE:

13:4 "Bisa nos, ki tempu e kosnan aki lo sosodé, i kiko lo ta e señal ora tur e kosnan aki lo wòrdu kumplí?"

13:5 I Jesus a kuminsá bisa nan: "Mira pa ni un hende no gaña boso.

13:6 Hopi lo bin den Mi nòmber, bisando: 'Ta ami t'E!' i lo gaña hopi hende.

13:7 I ora boso tende di gueranan i rumornan di gueranan, no spanta; e kosnan ei mester tuma lugá, ma ainda no ta e fin.

13:8 Pasobra nashon lo lanta kontra nashon, i reino kontra reino; lo tin temblor na varios lugá i lo tin hamber. E kosnan aki ta e prinsipio di dolónan di parto.

13:9 "Ma mira pa boso mes, pasobra nan lo entregá boso na Konsilio, i den snoanan boso lo wòrdu sutá, i boso lo para dilanti di gobernantenan i reinan pa Mi motibu, komo un testimonio pa nan.

13:10 I e evangelio mester wòrdu prediká promé na tur nashon.

13:11 I ora nan arestá boso i entregá boso, boso no preokupá di antemano kiko boso lo bisa, ma bisa loke wòrdu duná na boso na e ora ei, pasobra no ta boso ta papia, sino Spiritu Santu.

13:12 "I ruman lo entregá ruman na morto, i un tata su yu; i yunan lo lanta kontra nan mayornan i lo hasi ku nan lo wòrdu matá.

13:13 I tur hende lo odia boso pa kousa di Mi nòmber, ma esun ku pèrseverá te na fin, esei lo ta salbá.

13:14 "Ma ora boso mira e ABOMINASHON DI DESOLASHON, ku profeta Daniel a papia di djé, pará kaminda e no mester ta (laga esun ku ta lesa komprendé), e ora ei laga esnan ku ta na Judea hui bai na e serunan.

13:15 I no laga esun ku ta riba dak baha bai den su kas, ni drenta paden pa kohe nada den su kas;

13:16 i no laga esun ku ta den kunuku bai bèk pa kohe su mantel.

13:17 Ma ai di esnan ku ta na estado i esnan ku ta kria yu na pechu den e dianan ei!

13:18 Ma hasi orashon pa boso huída no sosodé den wenter.

13:19 Pasobra den e dianan ei lo tin un tempu di tribulashon manera nunka tabatin for di prinsipio di e kreashon ku Dios a krea, te awor aki, i ku lo no tin nunka mas tampoko.

13:20 I si Señor no a hasi e dianan ei mas kòrtiku, ningun bida lo no a wòrdu salbá; ma pa kousa di e eligínan ku El a skohe, El a hasi e dianan ei mas kòrtiku.

13:21 Anto si un hende bisa boso: 'Mira, at'e Cristo aki', òf: 'At'E aya', no ker'é;

13:22 pasobra Cristonan falsu i profetanan falsu lo lanta, i lo hasi señalnan i maraviyanan pa gaña, si ta posibel, asta e skohínan.

13:23 Ma tene kuidou; mira, Mi a bisa boso tur kos di antemano.

13:24 "Ma den e dianan ei, despues di e tribulashon ei, 'solo lo bira skur i luna lo no duna su klaridat.

13:25 I e streanan lo kai for di shelu, i e podernan ku ta den e shelunan lo wòrdu sakudí.'

13:26 "I e ora ei nan lo mira e Yu di Hende ta bin den nubianan ku gran poder i gloria.

13:27 I e ora ei E lo manda e angelnan, i lo reuní Su skohínan for di e kuater bientunan, for di ekstremo di tera te na ekstremo di shelu.

13:28 "Awor siña e parábola di e palu di figo: ora su rama a bira moli kaba, i e saka su blachinan, boso sa ku zomer ta serka.

13:29 Asina boso tambe, ora boso mira e kosnan aki ta sosodé, sabi ku E ta serka, dilanti di porta.

13:30 Di bèrdat Mi ta bisa boso, e generashon aki lo no pasa te ora tur e kosnan aki tuma lugá.

13:31 Shelu i tera lo pasa, ma Mi palabranan lo no pasa.

13:32 "Ma di e dia i e ora ei ni un hende no sa, ni e angelnan den shelu tampoko, ni e Yu, sino e Tata so.

13:33 Tene kuidou, keda alerta, pasobra boso no sa ki ora e tempu ta yega.

13:34 Ta manera un hende ku a bai hasi un biahe, kende a laga su kas i a pon'é na enkargo di su esklabunan, a duna kada un su tarea i tambe a ordená e wardadó di porta pa keda alerta.

13:35 "Pesei, keda alerta, pasobra boso no sa ki ora e señor di e kas ta bin, sea anochi, mei anochi, ora gai ta kanta, òf mainta,

13:36 pa e no bin direpiente i haña boso na soño.

13:37 I loke Mi ta bisa boso, Mi ta bisa tur: 'Keda alerta!'"

Marko 12 Marko 14