Levitiko 5
5:1
'Awor si un persona peka pasobra e no ta papia despues ku el a tende un yamada públiko pa testifiká enkuanto un kos ku el a mira òf a tende di djé, e ora ei e mester karga su kulpa.
5:2
'Of si un persona mishi ku un kos impuru, sea kadaver di un bestia impuru, òf kadaver di baka impuru, òf kadaver di bestia impuru ku ta kriul den otro, ounke ku e no a ripará esaki, i e ta impuru, e ora ei e lo ta kulpabel.
5:3
'Of si e mishi ku impuresa di hende, òf loke sea su impuresa ku ta hasié impuru, i e no ripará esaki, i despues e haña sa, e lo ta kulpabel.
5:4
'Of si un persona hura ku su lepnan sin pensa, pa hasi maldat òf pa hasi bon, den kualke asunto ku un hende ta papia sin pensa pa medio di un huramentu, i e no ta konsiente di esaki, i despues e haña sa di esaki, e lo ta kulpabel den un di e kosnan aki.
5:5
'I lo t'asina ku ora e bira kulpabel den un di e kosnan aki, e mester konfesá ku den esei el a peka.
5:6
Tambe e mester hiba pa SEÑOR su ofrenda pa kulpa pa su piká ku el a kometé, un bestia muhé for di e kria di bestia chikitu, un lamchi òf un kabritu komo un ofrenda pa piká. Asina e saserdote mester hasi ekspiashon p'é pa su piká.
5:7
'Ma si e no por duna un lamchi, e ora ei e mester hiba pa SEÑOR, komo su ofrenda pa kulpa pa su piká ku el a kometé, dos tòrteldùif òf dos pichon, esun komo un ofrenda pa piká i e otro komo un ofrenda kimá.
5:8
I e mester hiba nan pa e saserdote, kende mester ofresé promé esun ku ta pa e ofrenda pa piká, i e mester trose su kabes kita for di su nèk, sin kit'é kompletamente for di otro.
5:9
Tambe e mester sprèngu poko di e sanger di e ofrenda pa piká kontra e banda di e altar, mientras ku sobrá di e sanger mester wòrdu bashá na pia di e altar; ta un ofrenda pa piká.
5:10
Esun di dos e mester prepará e ora ei komo un ofrenda kimá segun e ordenansa. I e saserdote mester hasi ekspiashon p'é, pa su piká ku el a kometé, i e lo wòrdu pordoná.
5:11
'Ma si su medionan ta insufisiente pa dos tòrteldùif òf dos pichon, e ora ei e mester hiba komo su ofrenda pa e piká ku el a kometé, e désimo parti di un efa di hariña fini komo un ofrenda pa piká; e no mester pone zeta riba djé ni pone sensia riba djé, pasobra ta un ofrenda pa piká.
5:12
I e mester hiba esaki pa e saserdote, i e saserdote mester kohe un man yen di djé komo e porshon di konmemorashon i kim'é riba e altar, huntu ku e ofrendanan di kandela di SEÑOR; ta un ofrenda pa piká.
5:13
Asina e saserdote mester hasi ekspiashon p'é enkuanto su piká ku el a kometé den un di e kosnan aki, i e lo wòrdu pordoná; anto e sobrá mester keda pa e saserdote, meskos ku e ofrenda di mainshi.'"
5:14
E ora ei SEÑOR a papia ku Moisés, bisando:
5:15
"Si un persona aktua infielmente i peka no intenshonalmente kontra e kosnan santu di SEÑOR, e ora ei e mester hiba su ofrenda pa kulpa pa SEÑOR: un karné chubatu sin defekto for di e kria di bestia chikitu, segun bo baluashon na siklo di plata, segun e siklo di e santuario, komo un ofrenda pa kulpa.
5:16
I e mester hasi restitushon pa e piká ku el a hasi kontra e kos santu, i mester añadí un di sinku parti di djé i duna esaki na e saserdote. E ora ei e saserdote mester hasi ekspiashon p'é ku e karné chubatu di e ofrenda pa kulpa, i e lo wòrdu pordoná.
5:17
"Awor si un persona peka i hasi un di e kosnan ku SEÑOR a ordená pa no hasi, ounke ku e no tabata sa, tòg e ta kulpabel i mester karga su kastigu.
5:18
E ora ei e mester hiba pa e saserdote un karné chubatu sin defekto for di e kria di bestia chikitu, segun bo baluashon, komo un ofrenda pa kulpa. Asina e saserdote mester hasi ekspiashon p'é enkuanto su eror den kual el a peka no intenshonalmente, sin ku e tabata sa; i e lo wòrdu pordoná.
5:19
Ta un ofrenda pa kulpa; siguramente e tabata kulpabel dilanti di SEÑOR."