Lamentashonnan 5

BSNP Edita

5:1 Kòrda, O SEÑOR, loke a sosodé ku nos; wak, i mira nos reproche!

5:2 Nos erensia a wòrdu pasá pa stranheronan, nos kasnan pa deskonosínan.

5:3 Nos a bira wérfano sin tata, nos mamanan ta manera biuda.

5:4 Nos tin ku paga pa nos awa di bebe, nos tin ku paga pa nos mes palu.

5:5 Nos pèrsiguidónan ta riba nos nèk; nos ta morto kansá, no tin sosiegu pa nos.

5:6 Nos a someté nos mes na Egipto i Asiria, pa haña sufisiente pan.

5:7 Nos tatanan a peka i no ta eksistí mas; ta nos a karga nan inikidatnan.

5:8 Esklabu ta manda riba nos; no tin ningun hende pa libra nos for di nan man.

5:9 Ku riesgo pa nos bida nos ta haña nos pan, pa motibu di spada den desierto.

5:10 Nos kueru a bira mes kayente ku fòrnu, pa motibu di keintura di hamber.

5:11 Nan a violá e muhénan di Sion, e birgennan di e statnan di Juda.

5:12 Prensnan a wòrdu kologá na nan mannan; ansianonan no a wòrdu respetá.

5:13 Hobennan a sofoká nan kurpa na mulina; i mucha hòmbernan yòn a trompeká bou di karganan di palu.

5:14 Bo no ta mira ansianonan mas na e porta di stat, i hobennan a stòp di toka muzik.

5:15 No tin goso mas den nos kurason; nos baliamentu a wòrdu kambiá den rou.

5:16 E korona a kai for di nos kabes; ai di nos, pasobra nos a peka!

5:17 Pa motibu di esaki nos kurason ta desmayá; pa motibu di e kosnan aki nos wowonan ta bira skur;

5:18 pa motibu ku Seru Sion ta keda desolá, zoro ta kore tur kaminda riba djé.

5:19 Abo, O SEÑOR, ta reina pa semper; Bo trono ta di generashon pa generashon.

5:20 Pakiko Bo ta lubidá nos pa semper; pakiko Bo ta bandoná nos pa un tempu asina largu?

5:21 Hasi nos bolbe serka Bo, O SEÑOR, i nos lo bolbe; renobá nos dianan manera e dianan di promé aya,

5:22 a menos ku Bo a rechasá nos kompletamente i ta súmamente rabiá ku nos.