Lamentashonnan 4

BSNP Edita

Lamentashonnan 4

4:1 Esta skur e oro a bira! Mira kon e oro puru a kambia! E piedranan sagrado ta bashá na skina di tur kaya.

4:2 E yu hòmbernan presioso di Sion, ku un tempu a wòrdu balorá igual ku oro fini, mira kon nan ta wòrdu konsiderá komo butishi di klei, obra di e mannan di un alfarero!

4:3 Asta chakál ta duna pechu, nan ta laga nan chikitunan chupa; ma e yu muhé di mi pueblo a bira kruel, manera abestrus den desierto.

4:4 Lenga di bebi ta pega na su shel'i boka pa motibu di set; e chikitunan ta pidi pan, ma ningun hende no ta duna nan.

4:5 Esnan ku tabata kome delikatesa ta keda desolá den e kayanan; esnan ku a lanta den púrpura ta brasa monton di shinishi.

4:6 Pasobra e inikidat di e yu muhé di mi pueblo ta mas grandi ku e piká di Sodoma, ku a wòrdu destruí den un momento, sin ku tabatin ningun man pa yud'é.

4:7 Esnan konsagrá den djé tabata mas puru ku sneu, nan tabata mas blanku ku lechi; nan kurpa tabata mas kòrá ku koral, nan briyo manera safiro.

4:8 Nan aparensia ta mas pretu ku chemené; hende no ta rekonosé nan riba kaya; nan kueru ta pega na nan wesu, el a seka, el a bira manera palu.

4:9 Esnan ku a muri pa medio di spada ta mas fortuná ku esnan ku a muri dor di hamber; pasobra poko-poko esakinan ta kaba na nada pa falta di e frutanan di kunuku.

4:10 Man di muhénan di kompashon a herebé nan mes yunan; nan a bira kuminda pa nan, pa motibu di e destrukshon di e yu muhé di mi pueblo.

4:11 SEÑOR a kumpli ku Su furia, El a drama Su rabia ardiente; i El a sende un kandela den Sion ku a kaba ku su fundeshinan.

4:12 E reinan di tera, i tur e habitantenan di tera, lo no por a kere ku e atversario i e enemigu por a drenta e portanan di Jerusalèm.

4:13 Pa motibu di e pikánan di su profetanan i e inikidatnan di su saserdotenan, kendenan a drama e sanger di e hustunan meimei di djé,

4:14 nan tabata kana dwal, siegu, riba kaya; nan tabata asina sushi di sanger ku ningun hende no por a mishi ku nan pañanan.

4:15 "Bai! Impuru!" nan ta grita nan. "Bai, bai, no mishi!" Pesei nan a hui bai i a keda dwal; entre e nashonnan hende tabata bisa: "Nan lo no keda biba huntu ku nos mas."

4:16 E presensia di SEÑOR a plama nan; E lo no sigui paga tino na nan. Nan no a onra e saserdotenan, nan no a faboresé e ansianonan.

4:17 Tòg nos a kansa nos wowonan; buskamentu di yudansa tabata en bano. Den nos buskamentu nos a buska un nashon ku no por a salba.

4:18 Nan a sigui nos pasonan, asina ku nos no por a kana den nos kayanan; nos fin tabata aserkando, nos dianan a keda kumplí, pasobra nos fin a yega.

4:19 Nos pèrsiguidónan tabata mas lihé ku e águilanan di shelu. Nan a pèrsiguí nos riba e serunan; nan tabata skonde lur pa ataká nos den desierto.

4:20 E rosea di nos bida, e ungí di SEÑOR, a wòrdu kapturá den nan trampanan, esun di kende nos a bisa: "Bou di su sombra nos lo biba meimei di e nashonnan."

4:21 Regosihá i sea kontentu, O yu muhé di Edòm, abo ku ta biba na tera di Uz; ma e kopa lo pasa serka bo tambe, i lo bo bira burachi i kita sunú.

4:22 E kastigu di bo inikidat a wòrdu kumplí, O yu muhé di Sion; E lo no lagabo keda den eksilio mas. Ma E lo kastigá bo inikidat, O yu muhé di Edòm; E lo trese bo pikánan na kla!

Lamentashonnan 3 Lamentashonnan 5