Lamentashonnan 3

BSNP Edita

Lamentashonnan 3

3:1 Ami ta e hòmber ku a mira aflikshon pa motibu di e bara di Su furia.

3:2 El a guiami i a hasimi kana den skuridat, i no den lus.

3:3 Siguramente El a bira Su man kontra mi bes tras bes, henter dia.

3:4 El a hasi mi karni i mi kueru kaba na mi kurpa, El a kibra mi wesunan.

3:5 El a lanta baluarte kontra mi i a rondonámi ku amargura i kontratiempo.

3:6 El a hasimi biba den lugánan skur, manera esnan ku ta morto pa hopi tempu kaba.

3:7 El a changami pa asina mi no skapa; El a hasi mi kadena pisá.

3:8 Asta ora mi sklama i yama pa yudansa, E ta rechasá mi orashon.

3:9 El a blòkia mi kamindanan ku piedra kòrtá; El a hasi mi berehanan tur trosí.

3:10 E ta pa mi manera un ber ku ta skonde lur pa ataká, manera un leon den lugánan sekreto.

3:11 El a lastrami for di kaminda i a habrimi tur for di otro; El a lagami sin yudansa.

3:12 El a span Su bog i a ponemi komo mekpùnt pa Su flecha.

3:13 El a hasi e flechanan for di Su muchila penetrá mi partinan paden.

3:14 Mi a bira un kos di hari pa henter mi pueblo, nan kantika di bofon henter dia.

3:15 El a yenami ku amargura, El a hasimi burachi ku apsintus.

3:16 I El a kibra mi djentenan ku greis; El a hasimi lastra den stòf.

3:17 I Abo a hala mi alma kit'é leu for di pas; mi a lubidá kiko ta felisidat.

3:18 Pesei mi ta bisa: "Mi forsa a peresé, i tambe mi speransa for di SEÑOR."

3:19 Kòrda mi aflikshon i mi dwalmentu, e apsintus i amargura.

3:20 Siguramente mi alma ta kòrda riba nan i ta keda abatí den mi.

3:21 Riba esaki mi ta pensa, pesei mi tin speransa.

3:22 Di bèrdat, e miserikòrdia di SEÑOR no ta kaba nunka, pasobra Su kompashon nunka no ta faya.

3:23 Tur mainta nan ta nobo; grandi ta Bo fieldat.

3:24 Mi alma ta bisa: "SEÑOR ta mi porshon, pesei ta den djE mi ta spera."

3:25 SEÑOR ta bon pa esnan ku ta warda riba djE, pa e alma ku ta busk'E.

3:26 Ta bon pa warda den silensio riba e salbashon di SEÑOR.

3:27 Ta bon pa un hòmber karga yugo den su hubentut.

3:28 Lagu'é sinta su so i keda ketu, pasobra El a pone esei riba djé.

3:29 Lagu'é pone su boka den stòf, kisas tin speransa.

3:30 Lagu'é duna su band'i kara na esun ku ta dal é; lagu'é wòrdu yená ku reproche.

3:31 Pasobra Señor lo no rechasá pa semper.

3:32 Maske E kousa tristesa, tòg E lo tin kompashon segun Su miserikòrdia abundante.

3:33 Pasobra E no ta afligí boluntariamente, ni ta hasi yunan di hende bira tristu.

3:34 E asunto di trapa tur prezo di e tera bou di Su pia,

3:35 di nenga hustisia na un hòmber den presensia di e Haltísimo,

3:36 di gaña un hende den su kaso di lei-- kosnan asina Señor no ta aprobá.

3:37 Ken ta esun ku ta papia, i esaki ta sosodé, si no ta Señor a ordená esaki?

3:38 No ta for di boka di e Haltísimo tantu bon komo malu ta sali?

3:39 Pakiko un hende bibu ta keha, un hende ta keha pa kastigu di su pikánan?

3:40 Laga nos saminá i investigá nos kamindanan, i laga nos bolbe serka SEÑOR.

3:41 Laga nos halsa nos kurason i nos mannan na Dios den shelu;

3:42 nos a transgresá i a rebeldiá; Bo no a pordoná.

3:43 Bo a tapa Bo mes ku rabia i a pèrsiguí nos; Bo a mata sin miserikòrdia.

3:44 Bo a tapa Bo mes ku un nubia, asina ku ningun orashon no por pasa.

3:45 Bo a hasi nos basura i sushedat meimei di e pueblonan.

3:46 Tur nos enemigunan a habri boka kontra nos.

3:47 Pániko i trampa a bin riba nos, desolashon i destrukshon.

3:48 Mi wowonan ta basha roi di awa pa motibu di e destrukshon di e yu muhé di mi pueblo.

3:49 Awa ta basha for di mi wowo ketu bai, sin stòp,

3:50 te ora SEÑOR wak abou i mira for di shelu.

3:51 Loke mi ta mira ta hasi mi alma tristu pa motibu di tur e yu muhénan di mi stat.

3:52 Sin motibu mi enemigunan a pèrsiguími manera ta pèrsiguí parha;

3:53 nan a kaba ku mi den e pos i a tira piedra riba mi.

3:54 Awa a tapa mi kabes; mi a bisa: "Mi ta pèrdí!"

3:55 Mi a invoká Bo nòmber, O SEÑOR, for di e profundidat di pos.

3:56 Bo a tende mi bos: "No skonde Bo orea pa mi suspiro, pa mi sklamashon pa yudansa."

3:57 Bo a hala serka ora mi a sklama na Bo; Bo a bisa: "No tene miedu!"

3:58 O Señor, Bo a pleita kaso di mi alma; Bo a redimí mi bida.

3:59 O SEÑOR, Bo a mira mi opreshon; huzga mi kaso.

3:60 Bo a mira tur nan vengansa, tur nan kòmplòtnan kontra mi.

3:61 Bo a tende nan reproche, O SEÑOR, tur nan kòmplòtnan kontra mi.

3:62 Lep di esnan ku ta atakámi i nan murmuramentu ta kontra mi henter dia.

3:63 Wak nan! Sea ku nan ta sintá òf lantá, t'ami ta nan kantika di bofon.

3:64 Abo lo paga nan, O SEÑOR, di akuèrdo ku e obra di nan mannan.

3:65 Abo lo duna nan duresa di kurason; Bo maldishon lo ta riba nan.

3:66 Lo Bo pèrsiguí nan den rabia, i destruí nan for di bou di e shelunan di SEÑOR!

Lamentashonnan 2 Lamentashonnan 4