Huesnan 12
12:1
E ora ei e hòmbernan di Efrain a wòrdu yamá huntu, i nan a krusa bai Zefon i a bisa Jefte: "Pakiko bo a krusa bai bringa kontra e yu hòmbernan di Amon sin yama nos pa bai ku bo? Nos lo kima bo kas ku bo aden."
12:2
I Jefte a bisa nan: "Ami ku mi pueblo tabatin un konflikto grandi ku e yu hòmbernan di Amon; ora mi a yama boso, boso no a librami for di nan man.
12:3
I ora mi a mira ku boso lo no a librami, mi a riska mi bida i a krusa bai kontra e yu hòmbernan di Amon, i SEÑOR a entregá nan den mi man. Pakiko anto boso a bin awe serka mi pa bringa kontra mi?"
12:4
E ora ei Jefte a reuní tur e hòmbernan di Galaad i a bringa kontra Efrain; i e hòmbernan di Galaad a derotá Efrain, pasobra nan a bisa: "Boso ta fugitivo di Efrain, O galaaditanan, meimei di Efrain i meimei di Manasés."
12:5
I e galaaditanan a kapturá e vadonan di Jordan enfrente di Efrain. I a sosodé ku ki ora ku kualkier di e fugitivonan di Efrain bisa: "Lagami krusa," e hòmbernan di Galaad tabata bis'é: "Bo ta un efrateo?" Si e bisa: "Nò,"
12:6
e ora ei nan tabata bis'é: "Bisa 'Shibolet' anto." I si e bisa "Sibolet", pasobra e no por a pronunsi'é korektamente, e ora ei nan tabata gar'é i mat'é na e vadonan di Jordan. Asina kuarent'i dos mil hòmber di Efrain a muri e tempu ei.
12:7
I Jefte a huzga Israel seis aña. Anto Jefte e galaadita a muri i a wòrdu derá den un di e statnan di Galaad.
12:8
Awor despues di djé Ibzan di Bètlehèm a huzga Israel.
12:9
I e tabatin trinta yu hòmber, i trinta yu muhé ku el a kasa fuera di su famia, i el a trese trinta yu muhé di otro lugá pa su yu hòmbernan. I el a huzga Israel shete aña.
12:10
Anto Ibzan a muri i a wòrdu derá na Bètlehèm.
12:11
Awor Elon e zabulonita a huzga Israel despues di djé; i el a huzga Israel dies aña.
12:12
Anto Elon e zabulonita a muri i a wòrdu derá na Ajalon na tera di Zabulon.
12:13
Awor Abdon, yu hòmber di Hilel e piratonita, a huzga Israel despues di djé.
12:14
I e tabatin kuarenta yu hòmber i trinta nietu, kendenan tabata kore riba setenta buriku; i el a huzga Israel ocho aña.
12:15
Anto Abdon, yu hòmber di Hilel e piratonita, a muri i a wòrdu derá na Piraton na tera di Efrain, den e serunan di e amalekitanan.