Yozue 17
17:1
Awor esaki tabata e lòt pa e tribu di Manasés, pasobra e tabata e primogénito di Jose. Galaad i Basan a wòrdu duná na Makir, e primogénito di Manasés, tata di Galaad, pasobra e tabata un hòmber di guera.
17:2
Asina a tira lòt pa e restu di e yu hòmbernan di Manasés, segun nan famianan: pa e yu hòmbernan di Abiezer i pa e yu hòmbernan di Helek i pa e yu hòmbernan di Asriel i pa e yu hòmbernan di Sikem i pa e yu hòmbernan di Hefer i pa e yu hòmbernan di Semida; esakinan tabata e desendientenan hòmber di Manasés, yu hòmber di Jose segun nan famianan.
17:3
Sinembargo, Zelofehad, yu hòmber di Hefer, yu hòmber di Galaad, yu hòmber di Makir, yu hòmber di Manasés, no tabatin yu hòmber, sino solamente yu muhé; i esakinan ta nòmber di su yu muhénan: Maala i Noa, Hogla, Milka i Tirsa.
17:4
I nan a bin dilanti di saserdote Eleazar i dilanti di Josué, yu hòmber di Nun, i dilanti di e lidernan, bisando: "SEÑOR a ordená Moisés pa duna nos un erensia meimei di nos ruman hòmbernan." Pesei, konforme e òrdu di SEÑOR, el a duna nan un erensia meimei di e ruman hòmbernan di nan tata.
17:5
Asina e dies partinan a toka Manasés, fuera di tera di Galaad i Basan, ku ta keda na e otro banda di Jordan,
17:6
pasobra e yu muhénan di Manasés a risibí un erensia entre su yu hòmbernan. I tera di Galaad tabata pertenesé na e otro yu hòmbernan di Manasés.
17:7
I e frontera di Manasés tabata kore di Aser pa Mikmetat, ku tabata keda pariba di Sikem; anto e frontera tabata bai sùit na e habitantenan di En-tapúa.
17:8
E tera di Tapúa tabata pertenesé na Manasés, ma Tapúa na frontera di Manasés tabata pertenesé na e yu hòmbernan di Efrain.
17:9
I e frontera tabata baha bai na e roi di Kaná, pasùit di e roi (e statnan aki tabata pertenesé na Efrain meimei di e statnan di Manasés), i e frontera di Manasés tabata keda na e parti panòrt di e roi, i e tabata kaba na laman.
17:10
E banda pasùit tabata pertenesé na Efrain i e banda panòrt, na Manasés, i e laman tabata nan frontera; i parti panòrt nan tabata yega te na Aser, i parti pariba te na Isakar.
17:11
Anto na Isakar i na Aser, Manasés tabatin Bèt-sean ku su statnan i Ibleam ku su statnan, i e habitantenan di Dor ku su statnan, i e habitantenan di Endor ku su statnan, i e habitantenan di Taanak ku su statnan, i e habitantenan di Meguido ku su statnan--esun di tres ta Nafet.
17:12
Ma e yu hòmbernan di Manasés no por a poderá di e statnan aki, pasobra e kananeonan tabata determiná pa keda biba na e tera ei.
17:13
I a sosodé ku ora e yunan di Israel a bira fuerte, nan a pone e kananeonan hasi trabou fòrsá, ma nan no a kore ku nan kompletamente.
17:14
E ora ei e yu hòmbernan di Jose a papia ku Josué, bisando: "Pakiko bo a dunami solamente ún lòt i ún porshon komo erensia, siendo ku mi ta un pueblo numeroso ku SEÑOR a bendishoná te asina leu?"
17:15
I Josué a kontestá nan: "Si boso ta un pueblo numeroso, bai den mondi-será i habri un lugá pa boso mes ayanan den e tera di e ferezeonan i di e refaitanan, komo ku e serunan di Efrain ta muchu pèrtá pa boso."
17:16
I e yu hòmbernan di Jose a bisa: "E serunan no ta basta pa nos, i tur e kananeonan ku ta biba den e vaye tin garoshi di heru, tantu esnan ku ta na Bèt-sean ku su statnan komo esnan ku ta den e vaye di Jezreel."
17:17
I Josué a papia ku e kas di Jose, ku Efrain i Manasés, bisando: "Bo ta un pueblo numeroso i bo tin gran poder; lo bo no tin ún lòt so,
17:18
ma e serunan lo ta di bo. Pasobra ounke ku e ta un mondi-será, lo bo habrié i te na su fronteranan di mas leu e lo ta di bo; pasobra lo bo kore ku e kananeonan, maske nan tin garoshi di heru i maske nan ta fuerte."