Yozue 14
14:1
Awor esakinan ta e teritorionan ku e yunan di Israel a eredá na tera di Kanaan, ku saserdote Eleazar i Josué, yu hòmber di Nun, i e kabesnan di e kasnan di e tribunan di e yunan di Israel a parti entre nan komo erensia,
14:2
segun e lòt di nan erensia, manera SEÑOR a ordená pa medio di Moisés, pa e nuebe tribunan i e mitar tribu.
14:3
Pasobra Moisés a duna e dos tribunan i e mitar tribu erensia na e otro banda di Jordan, ma e no a duna erensia na e levitanan meimei di nan.
14:4
Pasobra e yu hòmbernan di Jose tabata dos tribu, Manasés i Efrain, i nan no a duna un parti na e levitanan den e tera, sino solamente statnan pa biba aden, ku nan lugánan di yerba bèrdè pa nan bestianan di kria i nan propiedat.
14:5
Asina e yunan di Israel a hasi meskos ku SEÑOR a ordená Moisés, i nan a parti e tera.
14:6
E ora ei e yu hòmbernan di Juda a bin serka Josué na Gilgal, i Kalèb, yu hòmber di Jefone e kenezeo, a bis'é: "Bo ta kòrda e palabra ku SEÑOR a papia ku Moisés, e hòmber di Dios, tokante di abo i ami na Kades-barnea.
14:7
Mi tabatin kuarenta aña tempu ku Moisés, e sirbidó di SEÑOR, a mandami for di Kades-barnea pa spioná e tera, i mi a bolbe bèk ku notisia p'é, manera mi tabata sinti esaki den mi kurason.
14:8
Sinembargo, mi rumannan ku a bai ku mi a pone kurason di e pueblo dirti di miedu; ma ami a sigui SEÑOR mi Dios kompletamente.
14:9
Asina Moisés a hura e dia ei, bisando: 'Siguramente e tera ku bo pia a trapa lo ta un erensia pa bo i pa bo yunan pa semper, pasobra bo a sigui SEÑOR mi Dios kompletamente.'
14:10
"I awor, mira, SEÑOR a lagami biba, manera El a bisa, e kuarent'i sinku añanan aki, for di tempu ku SEÑOR a papia e palabra aki ku Moisés, tempu ku Israel tabata kana den desierto; i awor, mira, awe mi tin ochent'i sinku aña.
14:11
Awe mi ta mes fuerte ainda ku dia Moisés a mandami; manera mi forsa tabata e tempu ei, asina mi forsa ta awor aki, pa bai guera i pa sali i pa drenta.
14:12
Pesei anto, dunami e serunan aki ku SEÑOR a papia di djé e dia ei, pasobra bo a tende e dia ei ku e anakeonan tabata ayanan, ku statnan grandi i fortifiká; podisé SEÑOR lo ta ku mi, i lo mi kore ku nan manera SEÑOR a papia."
14:13
Asina Josué a bendishon'é, i a duna Kalèb, yu hòmber di Jefone, Hebròn komo erensia.
14:14
Pesei Hebròn a bira e erensia di Kalèb, yu hòmber di Jefone e kenezeo, te dia djawe, pasobra el a sigui SEÑOR Dios di Israel kompletamente.
14:15
Awor antes nòmber di Hebròn tabata Kiriat-arba; pasobra Arba tabata e hòmber di mas grandi entre e anakeonan. I e tera a sosegá, pasobra no tabatin guera mas.