Job 38

BSNP Edita

38:1 E ora ei SEÑOR a kontestá Jòb for di e warwarú i a bisa:

38:2 "Ta ken esaki ta ku ta hasi konseho bira skur pa medio di palabranan sin konosementu?

38:3 Awor faha bo hep manera hòmber, i Ami lo hasibo pregunta, i abo lo instruíMi!

38:4 "Na unda bo tabata tempu ku Mi a pone fundeshi di mundu? BisaMi, si bo tin komprendementu.

38:5 Ken a determiná su midínan, ya ku bo sa esei? Of ken a ekstendé e liña-di-midi riba djé?

38:6 Riba kiko su fundeshinan a wòrdu wantá? Of ken a pone su piedra-di-skina,

38:7 tempu ku e streanan di mardugá tabata kanta huntu, i tur e yu hòmbernan di Dios tabata grita di alegria?

38:8 "Of ken a sera e laman ku portanan, ora ku el a bash'afó i a sali for di matris;

38:9 ora Mi a traha un bistí di nubia p'é, i a laga skuridat diki sirbi komo su paña di lombrishi,

38:10 i Mi a stablesé su límitenan, i Mi a pone un tranka i portanan,

38:11 i Mi a bisa: 'Te aki bo ta yega, ma no mas leu; i aki bo olanan orguyoso lo para'?

38:12 "Un dia den bo bida bo a yega di duna òrdu na e mainta, i a hasi mardugá konosé su lugá,

38:13 pa asina esaki por a tene e finnan di tera wantá, i e malbadonan wòrdu sakudí for di djé?

38:14 E ta wòrdu kambiá manera klei bou di seyo, i ta tuma aparensia di un bistí.

38:15 I lus di e malbadonan ta wòrdu kitá, i e brasa halsá ta wòrdu kibrá.

38:16 "Bo a yega di penetrá te den e fuentenan di laman? Of bo a yega di kana rònt den e lugánan skondí di profundidat?

38:17 E portanan di morto a wòrdu revelá na bo? Of bo a mira e portanan di skuridat profundo?

38:18 Bo a komprendé e hanchura di mundu? BisaMi anto, si bo sa tur esaki.

38:19 "Unda e kaminda pa e habitashon di lus ta keda? I skuridat, unda su lugá ta,

38:20 pa bo por hib'é na su teritorio, i pa bo por konosé e berehanan pa su kas?

38:21 Bo sa, pasobra e tempu ei bo a nase kaba, i e kantidat di bo dianan ta hopi!

38:22 "Bo a yega di drenta e depósitonan di sneu, òf bo a mira e depósitonan di hagel,

38:23 ku Mi tin reservá pa e tempu di angustia, pa e dia di guera i bataya?

38:24 Unda e lugá ta, kaminda lus ta wòrdu dividí, òf bientu di pariba ta wòrdu plamá riba tera?

38:25 Ta ken a habri un kanal pa e diluvio, òf un kaminda pa lamper i strena,

38:26 pa trese awaseru riba un tera kaminda no tin hende, riba un desierto, kaminda no tin hende,

38:27 pa satisfasé e tera bandoná i desolá, i pa hasi simia di yerba spreit?

38:28 Awaseru tin tata? Of ta ken a engendrá e gotanan di serena?

38:29 For di ken su matris eis a sali? I eis di shelu, ta ken a parié?

38:30 Awa ta bira duru manera piedra, i superfisio di e abismo a vris.

38:31 "Bo por mara e kadenanan di Pleyades, òf lòs e kabuyanan di Orion?

38:32 Bo por dirigí un konstelashon den su temporada di aña, òf guia e Ber ku su streanan?

38:33 Bo konosé e ordenansanan di e shelunan, òf bo por stablesé nan dominio riba tera?

38:34 "Bo por halsa bo bos na e nubianan, asina ku abundansia di awa por tapabo?

38:35 Bo por manda lampernan, asina ku nan por bai i bisabo: 'Ata nos aki'?

38:36 Ken a pone sabiduria den e spiritu, òf ken a duna inteligensia na e mente?

38:37 Ken por konta e nubianan pa medio di sabiduria, òf kènter e butishinan di awa di e shelunan,

38:38 ora stòf bira un klòmpi duru, i e klòmpinan pega na otro?

38:39 "Bo por yag proi pa e leon, òf satisfasé apetit di e leonnan chikitu,

38:40 ora nan ta drumi warda den nan kuebanan, i ta keda spera den nan lugá di skonde?

38:41 Ken ta prepará kuminda pa raf, ora su chikitunan ta grita na Dios, i ta dwal rònt sin kuminda?

Job 37 Job 39