Job 33

BSNP Edita

Job 33

33:1 "Sinembargo, mi ta rogabo Jòb, tende mi diskurso, i skucha tur mi palabranan.

33:2 At'awor mi ta habri mi boka; mi lenga den mi boka ta papia.

33:3 Mi palabranan ta sali for di e rektitut di mi kurason; i mi lepnan ta papia konosementu ku tur sinseridat.

33:4 Ta e Spiritu di Dios a trahami, i e rosea di e Todopoderoso ta dunami bida.

33:5 Kontestámi si bo por; prepará bo palabranan mi dilanti; lanta para.

33:6 Mira, mi ta pertenesé na Dios meskos ku bo; mi tambe a wòrdu formá for di klei.

33:7 Mira, no laga miedu pa mi terorisábo, ni mi man no mester keda pisá riba bo.

33:8 "Siguramente bo a papia pa mi tende, i mi a tende e zonidu di bo palabranan:

33:9 'Mi ta puru, sin transgreshon; mi ta inosente i no tin inikidat den mi.

33:10 Tòg E ta haña falta den mi; E ta konsiderámi Su enemigu.

33:11 E ta pone mi pianan na sepa, E ta vigilá tur mi berehanan.'

33:12 "Mira, lo mi kontestábo: den esaki bo no ta hustu, pasobra Dios ta mas grandi ku hende.

33:13 Pakiko bo ta keha kontra djE, ku E no ta duna kuenta di tur loke E ta hasi?

33:14 Di bèrdat, Dios ta papia ún biaha, òf dos biaha, ma ningun hende no ta ripará esei.

33:15 Den un soño, un vishon di anochi, ora ku soño profundo baha riba hende, mientras ku nan ta drumi riba nan kama,

33:16 e ora ei E ta habri orea di hende, i ta seya nan instrukshon,

33:17 pa E kita hende for di su mal kaminda, i warda hende for di orguyo;

33:18 E ta warda su alma for di graf, i su bida pa e no peresé pa medio di spada.

33:19 Tambe hende ta wòrdu kastigá ku doló riba su kama, i ku doló konstante den su wesunan;

33:20 asina ku su bida ta aboresé pan, i su alma su kuminda preferí.

33:21 Su karni ta kaba na su kurpa, i su wesunan, ku bo no tabata por a mira, awor ta sali.

33:22 E ora ei su alma ta yega serka di graf, i su bida serka di esnan ku ta kousa morto.

33:23 "Si tin un angel komo mediador p'é, un entre mil, pa kòrda hende kiko ta korekto p'é,

33:24 anto lagu'E mustr'é miserikòrdia, i bisa: 'Libr'é di baha den graf, mi a haña un redenshon';

33:25 laga su karni bira mas suave ku esun di mucha, lagu'é bolbe na e dianan di vigor di su hubentut.

33:26 E ora ei e lo hasi orashon na Dios, i Dios lo asept'é, asina ku e por mira Dios Su kara ku alegria, i Dios por restorá Su hustisia na hende.

33:27 E lo kanta pa hende i bisa: 'Mi a peka i a pèrvèrtí loke ta korekto, ma mi no a haña loke mi tabata meresé.

33:28 El a redimí mi alma pa e no baha den graf, i mi bida lo mira e lus.'

33:29 "Mira, hopi bes Dios ta hasi tur e kosnan aki ku hende,

33:30 pa trese su alma bèk for di graf, asina ku e por wòrdu iluminá ku e lus di bida.

33:31 "Pone atenshon, O Jòb, skuchami; keda ketu i lagami papia.

33:32 Anto si bo tin kualke kos di bisa, kontestámi; papia, pasobra mi tin deseo di hustifikábo.

33:33 Si no, abo skuchami; keda ketu, i lo mi siñabo sabiduria."

Job 32 Job 34