Job 3

BSNP Edita

3:1 Despues Jòb a habri su boka i a maldishoná e dia ku el a nase.

3:2 I Jòb a bisa:

3:3 "Laga e dia riba kual mi a nase peresé, i e anochi ku a bisa: 'Un yu hòmber ta konsebí.'

3:4 Laga e dia ei ta skuridat; laga Dios aya riba no pèrkurá p'é, ni lus briya riba djé.

3:5 Laga skuridat i sombra di morto poderá di djé; laga un nubia reposá riba djé; laga e skuridat di e dia ei teroris'é.

3:6 I e anochi ei, laga skuridat gar'é; no lagu'é wòrdu kontá den e dianan di aña; no lagu'é ta den e kantidat di lunanan.

3:7 Mira, laga e anochi ei ta steril; no laga ningun gritu di alegria resoná den djé.

3:8 Laga esnan ku ta maldishoná dia, maldishon'é, esnan ku tin e abilidat pa spièrta Leviatan.

3:9 Laga su streanan di mainta bira skur; lagu'é spera lus, sin haña; tampoko no lagu'é mira e habrimentu di dia,

3:10 pasobra e no a sera boka di matris di mi mama, ni a skonde miseria pa mi wowonan.

3:11 "Pakiko mi no a muri na ora di mi nasementu, sali for di barika di mi mama i peresé?

3:12 Pakiko e rudianan a risibími, i pakiko e pechunan, pa mi bebe?

3:13 Sino awor lo mi tabata sosegá na pas; lo mi tabata drumí e ora ei, lo mi tabata sosegá

3:14 huntu ku reinan i konseheronan di e tera, ku a rekonstruí ruinanan pa nan mes;

3:15 òf huntu ku prensnan ku tabatin oro, ku tabata yena nan kasnan ku plata.

3:16 Of derá manera un meskram, lo mi no tabat'ei, manera yuchi ku nunka a mira lus.

3:17 Ayanan e malbadonan ta stòp di molestiá; i ayanan esnan kansá tin sosiegu.

3:18 E prezonan ta sosegá huntu; nan no ta tende bos di e kapatas.

3:19 Chikitu i grandi ta ayanan, i e esklabu ta liber di su shon.

3:20 "Pakiko lus ta wòrdu duná na esun ku ta sufri, i bida na esun ku tin amargura di alma,

3:21 ku ta deseá morto, ma morto no ta bin, i ta koba busk'é mas ku tesoronan skondí;

3:22 ku ta alegrá grandemente, i ta regosihá ora ku nan haña e graf?

3:23 Pakiko lus ta wòrdu duná na un hòmber, kende su kaminda ta skondí, i kende Dios a enserá na tur banda?

3:24 Pasobra asina mi mira mi kuminda, mi ta kuminsá suspirá, i mi kehamentunan ta bash'afó manera awa.

3:25 Pasobra loke mi ta teme ta bin riba mi, i loke mi tin miedu di djé ta sosodé ku mi.

3:26 Mi no tin pas, ni trankilidat, i mi no tin sosiegu, ma ta problema so ta bin."

Job 2 Job 4