Job 19

BSNP Edita

19:1 E ora ei Jòb a kontestá:

19:2 "Kuantu tempu mas boso lo tormentámi, i kibrami na pida-pida ku palabra?

19:3 Ya ta dies biaha kaba ku boso a insultámi; boso no tin bèrguensa di tratami na manera inhustu.

19:4 Ounke di bèrdat mi a kometé eror, mi eror ta keda mi asunto.

19:5 Si di bèrdat boso kier halsa boso mes kontra mi, i dunami prueba di mi reproche,

19:6 sabi anto ku Dios a tratami na manera inhustu, i a sera Su reda rònt di mi.

19:7 "Ata, mi ta grita: 'Violensia!' ma mi no ta haña kontesta; mi ta grita pa yudansa, ma no tin hustisia.

19:8 El a sera mi kaminda ku muraya, asina ku mi no por pasa, i El a pone skuridat den mi berehanan.

19:9 El a ranka mi onor kita for di mi, i a kita e korona for di riba mi kabes.

19:10 E ta kibrami na tur banda, i mi no t'ei mas; i mi speransa El a ranka manera ta ranka un palu ku rais ku tur.

19:11 Tambe El a laga Su rabia sende kontra mi, i a konsiderámi komo Su enemigu.

19:12 Su trupanan ta bin huntu, i ta traha nan baluarte kontra mi, i ta pone nan kampamentu rònt di mi tènt.

19:13 "El a alehá mi rumannan leu for di mi, i mi konosínan a bira kompletamente straño pa mi.

19:14 Mi famianan a faya, i mi amigunan íntimo a lubidámi.

19:15 Esnan ku ta biba den mi kas i mi sirbientenan ta konsiderámi komo un hende straño. Mi ta un stranhero den nan bista.

19:16 Mi ta yama mi sirbidó, ma e no ta kontestá; mi mester rogu'é ku mi boka.

19:17 Mi esposa tin tegi di mi rosea, i mi mes rumannan tin asko di mi.

19:18 Asta mucha chikitu ta despresiámi; ora mi lanta para, nan ta papia kontra mi.

19:19 Tur mi amigunan íntimo ta aboresémi, i esnan ku mi ta stima a bira kontra mi.

19:20 Mi wesunan ta pega na mi kueru i na mi karni, solamente mi karn'i djente a keda.

19:21 "Tene duele di mi, tene duele di mi, O boso, mi amigunan, pasobra e man di Dios a dal mi.

19:22 Pakiko boso ta pèrsiguími manera Dios ta hasi, i no ta keda satisfecho ku mi karni?

19:23 "Mara mi palabranan por a wòrdu skirbí! Mara nan por a wòrdu skirbí den un buki!

19:24 Ku nan por a wòrdu grabá ku pèn di heru i chumbu den baranka pa semper!

19:25 Pasobra mi sa ku mi Redentor ta biba, i ku na final E lo para riba tera.

19:26 I despues ku mi kueru keda destruí, mi sa esaki, ku den mi karni lo mi mira Dios,

19:27 Kende ami mes lo mira, i mi mes wowo lo mira i ningun otro hende. Mi kurason ta anhelá den mi.

19:28 "Si boso bisa: 'Kon nos lo pèrsiguié?' I 'Ki preteksto pa un kaso nos por haña kontra djé?'

19:29 Anto boso mes tene miedu di e spada, pasobra furia ta trese e kastigu di spada, pa boso por sa ku tin huisio."

Job 18 Job 20