Yeremias 41
41:1
Awor a sosodé den e di shete luna ku Ismael, yu hòmber di Netanias, yu hòmber di Elisama, di e famia real i di e ofisialnan prinsipal di rei, huntu ku dies hòmber, a bin Mizpa serka Gedalias, yu hòmber di Ahikam. Mientras ku nan tabata kome pan huntu aya na Mizpa,
41:2
Ismael, yu hòmber di Netanias, i e dies hòmbernan ku tabata huntu kuné, a lanta para i a mata Gedalias, yu hòmber di Ahikam, yu hòmber di Safan, ku spada. Asina nan a mata esun ku rei di Babilonia a nombra riba e tera.
41:3
Tambe Ismael a mata tur e hudiunan ku tabata huntu kuné, esta, huntu ku Gedalias na Mizpa, i e kaldeonan ku tabata ayanan, esta, e hòmbernan di guera.
41:4
Awor a sosodé ku riba e siguiente dia, despues ku Gedalias a wòrdu matá, sin ku ningun hende tabata sa di esaki ainda,
41:5
ochenta hòmber a bin for di Sikem, for di Silo i for di Samaria, ku nan barba feitá limpi-limpi, nan paña kibrá i nan kurpa tur na kòrtá di kuchú, ku ofrendanan di mainshi i sensia den nan man, pa hiba na e kas di SEÑOR.
41:6
E ora ei Ismael, yu hòmber di Netanias, a sali for di Mizpa pa kontra ku nan, i segun ku e tabata bai e tabata yora; i a sosodé ku ora el a kontra ku nan, el a bisa nan: "Bin serka Gedalias, yu hòmber di Ahikam!"
41:7
Ma a sosodé ku asina ku nan a drenta den e stat Ismael, yu hòmber di Netanias, i e hòmbernan ku tabata huntu kuné, a mata nan i a tira nan den rembak.
41:8
Ma entre nan tabatin dies hòmber ku a bisa Ismael: "No mata nos, pasobra nos tin provishon di trigo, puspas, zeta i miel skondí den kunuku." Asina ta ku e no a mishi ku nan i no a mata nan huntu ku nan kompañeronan.
41:9
Awor e rembak kaminda Ismael a tira tur e kadavernan di e hòmbernan, ku el a mata pa motibu di Gedalias, tabata esun ku rei Asa a traha komo parti di su defensa kontra Baasa, rei di Israel. Ismael, yu hòmber di Netanias, a yen'é ku e mortonan.
41:10
Anto Ismael a hiba komo katibu henter e restante di e pueblo ku tabata na Mizpa: e yu muhénan di rei i henter e pueblo ku a keda na Mizpa, ku Nabuzaradan, e kapitan di guardia, a pone na enkargo di Gedalias, yu hòmber di Ahikam; asina Ismael, yu hòmber di Netanias, a kohe nan komo katibu i a sali pa krusa bai serka e yu hòmbernan di Amon.
41:11
Ma Johanan, yu hòmber di Karea, i tur e komandantenan di e ehérsitonan ku tabata huntu kuné a tende di tur e maldat ku Ismael, yu hòmber di Netanias, a hasi.
41:12
Asina nan a bai ku tur e hòmbernan pa bringa kontra Ismael, yu hòmber di Netanias; i nan a hañ'é banda di e tanki grandi ku ta keda na Gabaon.
41:13
I a sosodé ku asina ku henter e pueblo ku tabata huntu ku Ismael a mira Johanan, yu hòmber di Karea, i e komandantenan di e ehérsitonan ku tabata huntu kuné, nan a bira kontentu.
41:14
I henter e pueblo ku Ismael a hiba komo katibu for di Mizpa a bira bèk i a bai serka Johanan, yu hòmber di Karea.
41:15
Ma Ismael, yu hòmber di Netanias, a skapa for di Johanan, huntu ku ocho hòmber, i a bai serka e yu hòmbernan di Amon.
41:16
E ora ei Johanan, yu hòmber di Karea, i tur e komandantenan di e ehérsitonan ku tabata huntu kuné, a saka for di Mizpa henter e restante di e pueblo ku el a rekobrá for di Ismael, yu hòmber di Netanias, despues ku Ismael a mata Gedalias, yu hòmber di Ahikam, esta, e hòmbernan ku tabata sòldá, e muhénan, e muchanan i e eunukonan ku el a trese bèk for di Gabaon.
41:17
I nan a bai i a keda na Gerut-kimam, ku ta keda pegá ku Bètlehèm, pa sigui nan kaminda pa Egipto,
41:18
pa motibu di e kaldeonan; pasobra nan tabatin miedu di nan, despues ku Ismael, yu hòmber di Netanias, a mata Gedalias, yu hòmber di Ahikam, kende rei di Babilonia a nombra riba e tera.