Yeremias 35
35:1
E palabra di SEÑOR ku a yega na Jeremias den e dianan di Joakim, yu hòmber di Josias, rei di Juda, bisando:
35:2
"Bai na kas di e rekabitanan i papia ku nan; trese nan den e kas di SEÑOR, den un di e salanan, i duna nan biña pa nan bebe."
35:3
Anto mi a bai buska Jaazanias, yu hòmber di Jeremias, yu hòmber di Habasinias, i su ruman hòmbernan, i tur su yu hòmbernan, i henter e kas di e rekabitanan,
35:4
i mi a trese nan den e kas di SEÑOR, den e sala di e yu hòmbernan di Hanan, yu hòmber di Igdalias, e hòmber di Dios, kual tabata keda banda di e sala di e ofisialnan, kual tabata keda riba esun di Maaseias, yu hòmber di Salum, e wardadó-di-porta.
35:5
E ora ei mi a pone kanikanan yen di biña i kopanan dilanti di e hòmbernan di e kas di e rekabitanan; i mi a bisa nan: "Bebe biña!"
35:6
Ma nan a bisa: "Nos lo no bebe biña, pasobra nos tata Jonadab, yu hòmber di Rekab, a duna nos òrdu, bisando: 'No bebe biña nunka, ni boso ni boso yunan.
35:7
I boso no mag traha kas, ni sembra simia, ni planta kunuku di wendrùif, ni tum'é pa boso; ma boso mester biba den tènt henter boso bida, pa boso keda hopi tempu na e tera kaminda boso ta biba komo stranhero.'
35:8
I nos a obedesé e bos di nos tata Jonadab, yu hòmber di Rekab, den tur loke el a ordená nos, pa no bebe biña nunka, ni nos, ni nos esposanan, ni nos yu hòmbernan ni nos yu muhénan,
35:9
ni traha kas pa nos biba aden; i nos no tin plantashon di wendrùif, ni kunuku, ni simia.
35:10
Den tènt so nos a biba, i nos a obedesé i a hasi konforme tur loke nos tata Jonadab a ordená nos.
35:11
Ma ora Nabukodonosor, rei di Babilonia, a lanta kontra e tera, nos a bisa: 'Laga nos bai Jerusalèm pa skapa for di e ehérsito di e kaldeonan i for di e ehérsito di Siria.' Asina nos a keda na Jerusalèm."
35:12
E ora ei e palabra di SEÑOR a yega na Jeremias, bisando:
35:13
"Asina e SEÑOR di ehérsitonan, e Dios di Israel, ta bisa: 'Bai i puntra e hòmbernan di Juda i e habitantenan di Jerusalèm: "Boso no kier aseptá instrukshon dor di skucha na Mi palabranan?" SEÑOR ta deklará.
35:14
"Jonadab, yu hòmber di Rekab, a ordená su yu hòmbernan pa no bebe biña, i e mandamentu aki a wòrdu obedesé. Te dia djawe nan no ta bebe biña, pasobra nan ta obedesé e mandamentu di nan tata. Ma Ami a papia ku boso bes tras bes; tòg boso no a obedeséMi.
35:15
Tambe Mi a manda tur Mi sirbidónan, e profetanan, bes tras bes serka boso, bisando: 'Boso tur bolbe for di boso mal kaminda i koregí boso echonan, i no sigui tras di otro diosnan pa adorá nan; anto boso lo biba den e tera ku Mi a duna boso i boso antepasadonan; ma boso no a inkliná boso orea ni a skucha na Mi.
35:16
Di bèrdat, e yu hòmbernan di Jonadab, yu hòmber di Rekab, a obedesé e mandamentu di nan tata ku el a ordená nan, ma e pueblo aki no a skucha na Mi.'"'
35:17
"Pesei, asina e SEÑOR Dios di ehérsitonan, e Dios di Israel, ta bisa: 'Mira, Mi ta bai trese riba Juda i riba tur e habitantenan di Jerusalèm henter e desaster ku Mi a pronunsiá kontra nan; pasobra Mi a papia ku nan, ma nan no a skucha, i Mi a yama nan, ma nan no a kontestá.'"
35:18
E ora ei Jeremias a bisa e kas di e rekabitanan: "Asina e SEÑOR di ehérsitonan, e Dios di Israel, ta bisa: 'Pasobra boso a obedesé e mandamentu di boso tata Jonadab, a warda tur su mandamentunan i a hasi konforme tur loke el a ordená boso,
35:19
pesei, asina e SEÑOR di ehérsitonan, e Dios di Israel, ta bisa: "Nunka Jonadab, yu hòmber di Rekab, lo no falta un hòmber pa para Mi dilanti."'"