Yeremias 24
24:1
Despues ku Nabukodonosor, rei di Babilonia, a kohe komo katibu Jekonias, yu hòmber di Joakim, rei di Juda, i e ofisialnan di Juda, huntu ku e hòmbernan di ofishi i smetnan, for di Jerusalèm, i a hiba nan Babilonia, SEÑOR a mustrami dos makutu di figo poní dilanti di e tèmpel di SEÑOR!
24:2
Den esun makutu tabatin figo masha bon mes, meskos ku figo ku ta e proménan ku ta hecha; i den e otro makutu tabatin figo masha malu mes, asina malu ku no por a kome nan.
24:3
E ora ei SEÑOR a puntrami: "Jeremias, kiko bo ta mira?" I mi a kontestá: "Figo, e bon figonan ta masha bon mes, ma e mal figonan ta masha malu mes, asina malu ku no por kome nan."
24:4
Anto e palabra di SEÑOR a yega na mi, bisando:
24:5
"Asina SEÑOR, e Dios di Israel, ta bisa: 'Manera e bon figonan aki, asina bon lo Mi konsiderá e prezonan di Juda ku Mi a saka for di e lugá aki manda na e tera di e kaldeonan.
24:6
Pasobra Mi bista lo ta fihá riba nan pa bon, i lo Mi trese nan atrobe na e tera aki; i lo Mi edifiká nan i no destruí nan, i lo Mi planta nan i no ranka nan.
24:7
Lo Mi duna nan un kurason pa konoséMi, pasobra Ami ta SEÑOR; i nan lo ta Mi pueblo, i Ami lo ta nan Dios, pasobra nan lo bolbe serka Mi ku henter nan kurason.
24:8
'Ma meskos ku e figonan malu, asina malu ku no por kome nan--pasobra t'asina SEÑOR ta bisa--asina lo Mi bandoná Sedekias, rei di Juda, su ofisialnan i e restante di Jerusalèm ku ta keda na e tera aki, i esnan ku ta biba na tera di Egipto.
24:9
I lo Mi hasi nan un teror i algu malu pa tur e reinonan di mundu, manera un reproche i un proverbio, un insulto i un maldishon tur kaminda ku Mi ta bai plama nan.
24:10
I lo Mi manda spada, hamber i pèst riba nan te ora ku nan keda destruí for di riba e tera ku Mi a duna nan i nan antepasadonan.'"