Yeremias 19
19:1
Asina SEÑOR ta bisa: "Bai kumpra un butishi di klei serka e alfarero i hiba algun ansiano di e pueblo i algun ansiano di e saserdotenan.
19:2
Anto bai na Vaye di Bèn-hinom, ku ta keda na entrada di e Porta Pariba, i proklamá ayanan e palabranan ku Ami lo dunabo,
19:3
i bisa: 'Skucha e palabra di SEÑOR, O reinan di Juda i habitantenan di Jerusalèm: asina e SEÑOR di ehérsitonan, e Dios di Israel, ta bisa: "Mira, Mi ta bai manda kalamidat riba e lugá aki, ku lo pone orea di tur esnan ku tende di djé flùit.
19:4
Pasobra nan a bandonáMi i a profaná e lugá aki i a kima sakrifisionan den djé na otro diosnan ku nunka nan ni nan antepasadonan, ni e reinan di Juda a yega di konosé; i pasobra nan a yena e lugá aki ku sanger di hende inosente,
19:5
i a traha e lugánan haltu di Baal, pa kima nan yu hòmbernan den kandela komo ofrenda kimá na Baal, un kos ku nunka Mi a ordená ni papia di djé, ni nunka a bin den Mi pensamentu.
19:6
Pesei, ata, e dianan ta bin," SEÑOR ta deklará, "ku e lugá aki lo no wòrdu yamá Tofet ni Vaye di Bèn-hinom mas, sino Vaye di Matansa.
19:7
"I lo Mi anulá e konseho di Juda i di Jerusalèm na e lugá aki, i lo Mi laga nan kai pa medio di spada dilanti di nan enemigunan i na man di esnan ku ta buska nan pa mata. I lo Mi entregá nan kadavernan pa parha di shelu i bestia di mondi kome.
19:8
Tambe lo Mi hasi e stat aki un desolashon i un opheto di bofon. Ken ku pasa banda di djé lo keda tur asombrá i lo hasi bofon di tur su desasternan.
19:9
I lo Mi pone nan kome karni di nan yu hòmbernan i karni di nan yu muhénan, i un lo kome karni di otro mientras ku nan enemigunan ta rònt di nan, i mientras ku nan ta den e ansha ku nan enemigunan i esnan ku ta buska nan pa mata ta pone nan aden."'
19:10
"E ora ei bo mester kibra e butishi den bista di esnan ku ta huntu ku bo,
19:11
i bisa nan: 'Asina e SEÑOR di ehérsitonan ta bisa: "Manera ta kibra pòchi ku un alfarero a traha, i ku no por wòrdu drechá mas, asina lo Mi kibra e pueblo i e stat aki. Nan lo dera na Tofet, pasobra no tin otro lugá pa dera.
19:12
Asin'aki lo Mi trata ku e lugá aki i ku su habitantenan," SEÑOR ta deklará, "i hasi e stat aki meskos ku Tofet.
19:13
I e kasnan di Jerusalèm i e kasnan di e reinan di Juda lo keda kontaminá meskos ku e lugá Tofet, pa motibu di tur e kasnan kaminda nan a kima sakrifisio riba dak pa henter e ehérsito di shelu, i a basha ofrendanan di bibida na otro diosnan."'"
19:14
E ora ei Jeremias a bolbe for di Tofet, kaminda SEÑOR a mand'é bai profetisá. I el a para riba plenchi di e kas di SEÑOR, i a bisa henter e pueblo:
19:15
"Asina e SEÑOR di ehérsitonan, e Dios di Israel, ta bisa: 'Mira, Mi ta bai manda riba e stat aki i riba tur su statnan chikitu henter e kalamidat ku Mi a deklará kontra djé, pasobra nan a hasi nan nèk steif i no kier a tende na Mi palabranan.'"