Isaias 66
66:1
Asina SEÑOR ta bisa: "Shelu ta Mi trono, i tera ta e banki pa Mi pia. Unda e kas ta anto ku abo por traha pa Mi? I unda tin un lugá pa Mi sosegá?
66:2
Pasobra ta Mi man a traha tur e kosnan aki, i asina tur e kosnan aki a bin na eksistensia," SEÑOR ta deklará. "Ma di esun aki lo Mi hasi kaso: di esun ku ta umilde i ku tin spiritu kibrá, i ku ta tembla pa Mi palabra.
66:3
Ma esun ku mata un buey ta manera un ku ta mata un hende; esun ku sakrifiká un lamchi ta manera un ku ta kibra garganta di kachó; esun ku ofresé ofrenda di mainshi ta manera un ku ta ofresé sanger di porko; esun ku kima sensia ta manera un ku ta bendishoná ídolo. Meskos ku nan a skohe nan mes kamindanan, i nan alma tin delisia den nan abominashonnan,
66:4
asina lo Mi skohe nan kastigu, i lo Mi trese riba nan loke nan tin miedu di djé. Pasobra Mi a yama, ma ni un hende no a kontestá; Mi a papia, ma nan no a skucha. Nan a hasi maldat den Mi bista, i a skohe loke Mi no tabatin delisia den djé."
66:5
Tende e palabra di SEÑOR, boso ku ta tembla pa Su palabra: "Boso ruman hòmbernan ku ta odia boso, ku ta ekskluí boso pa motibu di Mi nòmber, a bisa: 'Laga SEÑOR ta glorifiká, pa nos mira boso goso.' Ma nan lo wòrdu brongosá.
66:6
Un bos di boroto for di e stat! Un bos for di e tèmpel! E bos di SEÑOR, Kende ta duna Su enemigunan e pago meresí!
66:7
"Promé ku el a haña doló di parto, el a duna lus; promé ku su doló a kuminsá, el a duna lus na un yu hòmber.
66:8
Ken a yega di tende un kos asina? Ken a yega di mira kosnan asina? Un tera por nase den ún dia? Un nashon por wòrdu hañá den ún momento? Asina ku Sion a haña doló di parto, el a haña su yunan tambe.
66:9
Akaso Mi ta laga e momento di parto yega sin ku Mi ta laga e yu nase?" SEÑOR ta bisa. "Of Ami, Kende ta laga e yu nase, ta sera matris?" bo Dios ta bisa.
66:10
"Sea alegre huntu ku Jerusalèm i regosihá pa su motibu, boso tur ku ta stim'é; regosihá grandemente huntu kuné, boso tur ku ta yor'é,
66:11
pa boso bebe i keda satisfecho na su pechunan di konsuelo, pa boso bebe i tin delisia den e abundansia di su pechu."
66:12
Pasobra, asina SEÑOR ta bisa: "Mira, Mi ta dun'é pas manera un riu, i e gloria di e nashonnan manera un korida di awa ku ta basha ofer; boso lo bebe pechu, boso lo wòrdu kargá na hep, i karisiá riba skochi.
66:13
Manera esun ku su mama ta konsolá, asina lo Mi konsolá boso; i boso lo keda konsolá na Jerusalèm.
66:14
"E ora ei boso lo mira esaki, i boso kurason lo ta kontentu, i boso wesunan lo floresé manera yerba nobo; i e man di SEÑOR lo wòrdu hasí konosí na Su sirbidónan, ma E lo keda indigná pa ku Su enemigunan.
66:15
Pasobra mira, SEÑOR lo bin ku kandela, i Su garoshinan ta manera un warwarú, pa drama Su rabia ku furia, i Su reprendementu ku flam di kandela.
66:16
Pasobra ku kandela i ku Su spada SEÑOR lo ehekutá huisio riba tur karni, i esnan ku SEÑOR mata lo ta hopi.
66:17
"Esnan ku ta santifiká i ta purifiká nan mes pa bai den e hòfinan, siguiendo tras di esun meimei, kendenan ta kome karn'i porko, kos repugnante i raton, nan tur huntu lo yega na un fin," SEÑOR ta deklará.
66:18
"Pasobra Mi konosé nan obranan i nan pensamentunan; e tempu ta bin pa reuní tur nashon i lenga. I nan lo bin i mira Mi gloria.
66:19
"I lo Mi pone un señal meimei di nan i lo manda sobrebibientenan for di nan na e nashonnan--na Tarsis, Put, Lut, Meshek, Tubal i Javan--na e teranan na kosta te leu aya, ku no a tende di Mi fama ni a mira Mi gloria. I nan lo deklará Mi gloria meimei di e nashonnan.
66:20
Anto nan lo trese tur boso rumannan for di tur e nashonnan komo un ofrenda di mainshi na SEÑOR--riba kabai, den garoshi, den wagen, riba mula i riba kamel--na Mi seru santu Jerusalèm, meskos ku e yunan di Israel ta trese nan ofrenda di mainshi den un artíkulo-di-uzo limpi na e kas di SEÑOR," SEÑOR ta bisa.
66:21
"Tambe lo Mi tuma algun di nan komo saserdote i komo levita," SEÑOR ta bisa.
66:22
"Pasobra meskos ku e shelunan nobo i e tera nobo, ku lo Mi traha, lo permanesé Mi dilanti," SEÑOR ta deklará, "asina boso desendientenan i boso nòmber lo permanesé.
66:23
I lo ta di luna nobo pa luna nobo, i di sabat pa sabat, ku henter humanidat lo bin pa bùig Mi dilanti," SEÑOR ta bisa.
66:24
"Anto nan lo sali mira e kadavernan di e hòmbernan ku a transgresá kontra Mi; pasobra nan bichi lo no muri, i nan kandela lo no wòrdu pagá, i nan lo ta un abominashon pa henter humanidat."