Isaias 64

BSNP Edita

Isaias 64

64:1 O ku Bo lo a sker e shelunan i baha bin, ku e serunan lo a tembla den Bo presensia--

64:2 manera kandela ta kima palu seku, manera kandela ta hasi awa herebé-- pa hasi Bo nòmber konosí na Bo atversarionan, pa e nashonnan tembla dilanti di Bo presensia!

64:3 Tempu ku Bo a hasi kosnan temibel ku nos no a spera, bo a baha bin, e serunan tabata tembla dilanti di Bo presensia.

64:4 Pasobra for di tempunan aya nan no a tende, ni nan orea no a persibí, ni wowo no a mira un Dios fuera di Bo, Kende ta obra pa esun ku ta spera riba djE.

64:5 Bo ta bin na yudansa di esun ku ta gosa di hasi hustisia, ku ta kòrda riba Bo den Bo kamindanan. Mira, Bo tabata rabiá, pasobra nos a peka; nos a sigui den nan pa hopi tempu; anto nos lo wòrdu salbá?

64:6 Pasobra nos tur a bira manera hende ku ta impuru, i tur nos echonan hustu ta manera paña masha fis mes. Nos tur ta marchitá manera blachi, i manera bientu nos inikidatnan ta hiba nos bai kuné.

64:7 No tin ni un hende ku ta invoká Bo nòmber, ku ta hasi esfuerso pa tene na Bo; pasobra Bo a skonde Bo kara pa nos, i a entregá nos na e poder di nos inikidatnan.

64:8 Ma awor, O SEÑOR, Abo ta nos Tata, nos ta e klei i Abo ta nos alfarero; i nos tur ta e obra di Bo man.

64:9 No rabia di mas, O SEÑOR, ni kòrda inikidat pa semper; mira nos, nos ta pidiBo, pasobra nos tur ta Bo pueblo.

64:10 Bo statnan santu a bira un desierto, Sion a bira un desierto, Jerusalèm un desolashon.

64:11 Nos kas santu i bunita, kaminda nos tatanan tabata alabáBo, a wòrdu kimá ku kandela; i tur nos kosnan presioso a bira ruina.

64:12 O SEÑOR, lo Bo keda sin hasi nada pa motibu di e kosnan aki? Lo Bo keda ketu i afligí nos sin midí?

Isaias 63 Isaias 65