Isaias 31
31:1
Ai di esnan ku ta baha bai Egipto pa buska yudansa, ku ta dependé riba kabai i ta konfia den garoshi, pasobra nan ta hopi, i den koredó di kabai, pasobra nan ta masha fuerte mes, ma nan no ta mira na Esun Santu di Israel, ni nan no ta buska SEÑOR!
31:2
Tòg E tambe ta sabí i lo trese desaster, i no ta hala Su palabranan atras, ma lo lanta kontra e kas di hasidónan di maldat, i kontra e yudansa di esnan ku ta hasi inikidat.
31:3
Awor e egipsionan ta hende i no Dios, i nan kabainan ta karni i no spiritu; asina SEÑOR lo ekstendé Su man, i esun ku ta yuda lo trompeká, i esun ku a wòrdu yudá lo kai, i nan tur huntu lo yega na un fin.
31:4
Pasobra asina SEÑOR ta bisami: "Meskos ku leon òf leon yòn ta gruña riba su proi (ora ku un multitut di wardadó di karné ta reuní kontra djé, e no tin miedu di nan bos, ni ta sinti su mes molestiá dor di nan gritu), asina e SEÑOR di ehérsitonan lo baha bin pa bringa riba Seru Sion i riba su seritu."
31:5
Manera parhanan ku ta keda zwef, asina e SEÑOR di ehérsitonan lo protehá Jerusalèm. E lo proteh'é i libr'é; E lo defend'é i reskat'é.
31:6
Bolbe serka Esun ku boso a rebeldiá kontra djE asina tantu, O yunan di Israel.
31:7
Pasobra den e dia ei kada un di boso lo deshasí di su ídolonan di plata i di su ídolonan di oro, ku boso man pekaminoso a traha.
31:8
I e asirio lo kai pa medio di spada ku no ta di hende, i un spada ku no ta di hende lo devor'é. Asina e lo no skapa for di spada, i su hobennan lo ta obligá di hasi trabou fòrsá.
31:9
"I su baranka lo kaba na nada pa motibu di pániko, i su prensnan lo tin masha miedu mes di e emblema," SEÑOR, Kende Su kandela ta na Sion i Kende Su fòrnu ta na Jerusalèm, ta deklará.