Isaias 23

BSNP Edita

Isaias 23

23:1 Un profesia tokante di Tiro. Lamentá, O barkunan di Tarsis, pasobra Tiro a wòrdu destruí i a keda sin kas i sin haf; for di tera di Siprès nan a risibí e notisia aki.

23:2 Keda ketu, boso, habitantenan di tera na kosta, boso, komersiantenan di Sidon; boso mensaheronan a krusa laman.

23:3 Pasando riba hopi awanan e mainshi di Sihor-- e kosecha di Neil--tabata e ganashi di Tiro, i e tabata e merkado di nashonnan.

23:4 Tene bèrguensa, O Sidon, pasobra laman ta papia, e lugá fortifiká di laman ta bisa: "Mi no tabatin doló di parto, ni mi no a duna lus; mi no a lanta yu hòmber, ni mi no a kria birgen."

23:5 Ora ku e notisia yega Egipto, nan lo ta den ansha pa motibu di e notisia di Tiro.

23:6 Krusa bai Tarsis; lamentá, O habitantenan di tera na kosta.

23:7 Ta esaki ta boso stat alegre, kual su origen ta di tempunan antiguo, kual su pianan tabata hib'é pa kolonisá lugánan leu?

23:8 Ta ken a plania esaki kontra Tiro, esun ku ta regalá korona, esun ku su komersiantenan tabata prensnan, esun ku su negoshantenan tabata e onorabelnan di tera?

23:9 E SEÑOR di ehérsitonan a plania esaki pa rebahá e orguyo di tur bunitesa, pa menospresiá tur e onorabelnan di tera.

23:10 Inundá bo tera manera Neil ta hasi, O yu muhé di Tarsis; no tin nada mas pa want'é.

23:11 El a ekstendé Su man ofer di laman, El a hasi reinonan tembla. SEÑOR a duna un òrdu tokante di Kanaan pa destruí su lugánan fortifiká.

23:12 I El a bisa: "Lo bo no regosihá mas, O birgen desonrá, yu muhé di Sidon. "Lanta, krusa bai Kitim; ayanan tampoko lo bo no haña sosiegu."

23:13 Ata, e tera di e kaldeonan-- esaki ta e pueblo ku no ta eksistí mas. Asiria a destin'é pa ta un lugá pa bestia di desierto. Nan a lanta nan torennan di baluarte, nan a plùnder su palasionan, nan a hasié un ruina.

23:14 Lamentá, O barkunan di Tarsis, pasobra boso lugá fortifiká ta destruí.

23:15 Awor lo sosodé den e dia ei ku Tiro lo wòrdu lubidá pa setenta aña, e dianan di ún rei. Na fin di setenta aña lo sosodé ku Tiro manera e kantika di prostituta ta bisa:

23:16 "Kohe bo arpa, bai rònt den e stat, O prostituta ku hende a lubidá. Pika e kuèrdènan bunita asina, kanta hopi kantika, pa bo wòrdu rekòrdá."

23:17 I lo sosodé na fin di setenta aña ku SEÑOR lo bishitá Tiro. E ora ei e lo bai bèk na su pago di prostitushon i lo kometé fornikashon ku tur reino riba superfisio di tera.

23:18 I su ganashi i su pago di prostitushon lo wòrdu konsagrá na SEÑOR. Esaki lo no wòrdu wardá ni montoná, ma su ganashi lo bira sufisiente kuminda i bistínan di mas mihó pa esnan ku ta biba den e presensia di SEÑOR.

Isaias 22 Isaias 24