Isaias 21

BSNP Edita

Isaias 21

21:1 Un profesia tokante di e desierto na laman. Manera bientu fuerte di Negèv ta suta ketu bai, asina e ta bin for di desierto, for di un tera teribel.

21:2 Un vishon spantoso a wòrdu mustrá na mi: e traidó ta sigui trata ku traishon, i e destruidó ta destruí ketu bai. Subi, Elam, rondoná, Media! Mi a pone un fin na tur e kehamentu ku el a kousa.

21:3 Pa e motibu aki mi paden ta yen di angustia; doló a serami, manera doló di un muhé na ora di parto. Mi ta asina angustiá ku mi no por tende, asina yen di teror, ku mi no por mira.

21:4 Mi kurason ta bula; horor ta poderá di mi; e freskura di atardi ku mi tabata anhelá na djé, a bira temblamentu pa mi.

21:5 Nan ta pone mesa, nan ta habri paña di mesa, nan ta kome, nan ta bebe: "Lanta, boso prensnan, hunta e eskudonan ku zeta!"

21:6 Pasobra, asina Señor ta bisami: "Bai! Pone un hòmber vigilá. Lagu'é reportá loke e ta mira.

21:7 Ora ku e mira un trupa di koredó, koredó di kabai na dos-dos, un trupa di buriku, un trupa di kamel, lagu'é paga bon atenshon, hopi bon atenshon."

21:8 E ora ei e hòmber ku ta vigilá a grita manera leon: "O Señor, di dia mi ta para kontinuamente riba e toren di vigilansia, i tur anochi mi ta para na mi pòst.

21:9 Awor mira, un trupa di koredó ta bin, koredó di kabai na dos-dos." Anto un di nan a kontestá i a bisa: "Babilonia a kai, ta kai mes el a kai; i tur e imagennan di su diosnan a keda tur garná tirá abou na suela."

21:10 Ai mi pueblo batí, i mi afligínan di e plenchi-di-bati-mainshi! Loke mi a tende di e SEÑOR di ehérsitonan, e Dios di Israel, mi ta konta boso.

21:11 Un profesia tokante di Edòm. Un hende ta keda yamami for di Seir: "Guardia, kuantu ora mas a keda di anochi? Guardia, kuantu ora mas a keda di anochi?"

21:12 E guardia ta kontestá: "Mainta ta bin, ma anochi tambe. Si bo kier informá, anto informá; bin bèk atrobe."

21:13 Un profesia tokante di Arabia. Boso mester pasa nochi den e mondinan-será di Arabia, O karavananan di Dedan.

21:14 Trese awa pa esnan ku tin set, O habitantenan di tera di Tema; sali bai kontra ku e fugitivonan ku pan.

21:15 Pasobra nan a hui pa spada, pa spada saká for di baliña i pa bog gespan, i pa e preshon di bataya.

21:16 Pasobra t'asina Señor a bisami: "Aki un aña, manera un trahadó kontratá lo a konta esaki, tur splendor di Kedar lo tèrminá,

21:17 i esnan ku resta di e kantidat di tiradónan-di-flecha, e hòmbernan poderoso di e yunan di Kedar, lo ta poko, pasobra e SEÑOR Dios di Israel a papia."

Isaias 20 Isaias 22