Isaias 19

BSNP Edita

Isaias 19

19:1 Un profesia tokante di Egipto. Mira, SEÑOR ta kore riba un nubia ku ta pasa lihé, i ta serka di yega Egipto; e ídolonan di Egipto lo tembla den Su presensia, i kurason di e egipsionan lo dirti den nan paden.

19:2 "Asina lo Mi instigá egipsio kontra egipsio; i kada un di nan lo bringa kontra su ruman hòmber, i kada un kontra su próhimo, stat kontra stat i reino kontra reino.

19:3 Anto e spiritu di e egipsionan lo keda desanimá; i lo Mi bruha nan strategia, asina ku nan lo konsultá ku ídolo, spiritu di morto, montadó i spiritista.

19:4 Ademas, lo Mi entregá e egipsionan den man di un maestro kruel, i un rei violento lo goberná riba nan," e Señor DIOS di ehérsitonan ta deklará.

19:5 E awanan for di laman lo seka, i e riu lo keda seku-seku.

19:6 E kanalnan lo manda un holó stinki, e koridanan di awa di Egipto lo mengua te seka; richi i yerba lo putri bai.

19:7 E yerbanan di papirus kantu di Neil, na boka di Neil, i tur loke wòrdu sembrá den e kunukunan kantu di Neil lo seka, i bientu lo hiba nan i nan lo no t'ei mas.

19:8 E piskadónan lo lamentá, i tur esnan ku ta tira liña den Neil lo lamentá, i esnan ku ta tira reda den awa poko-poko lo kaba na nada.

19:9 Ademas, esnan ku ta traha lino fini i esnan ku ta wef tela blanku lo keda tur na bèrguensa.

19:10 I e pilarnan di Egipto lo wòrdu garná; tur trahadó kontratá lo sinti nan mes tristu.

19:11 Siguramente e prensnan di Zoan ta hende bobo; e konseho di e konseheronan di mas sabí di Farao a bira lokura. Kon boso por bisa Farao: "Mi ta yu di e sabínan, yu di e reinan di tempunan di antes"?

19:12 Unda bo hòmbernan sabí ta anto? Laga nan bisabo, i laga nan komprendé kiko e SEÑOR di ehérsitonan a proponé kontra Egipto.

19:13 E prensnan di Zoan a hasi kos di bobo; e prensnan di Menfis a keda engañá; esnan ku ta e piedra-di-skina di su tribunan a hasi Egipto dwal.

19:14 SEÑOR a meskla un spiritu di pèrvèrsidat den djé; nan a hasi Egipto dwal den tur loke e ta hasi, manera un hòmber burachi ta zeilu den loke el a saka.

19:15 I Egipto lo no tin trabou ku kabes òf rabu, rama di palma òf richi por hasi.

19:16 Den e dia ei e egipsionan lo bira manera muhé. Nan lo tembla i tin spantu pa motibu di e man di amenasa di e SEÑOR di ehérsitonan, ku E ta bai menasá nan kuné.

19:17 I tera di Juda lo bira un teror pa Egipto. Tur hende ku menshon'é lo tin miedu di djé, pa motibu di e propósito di e SEÑOR di ehérsitonan ku E ta proponé kontra nan.

19:18 Den e dia ei sinku stat den tera di Egipto lo papia lenga di Kanaan, i lo hura fieldat na e SEÑOR di ehérsitonan. Un lo wòrdu yamá Stat di Destrukshon.

19:19 Den e dia ei lo tin un altar pa SEÑOR meimei di tera di Egipto, i un pilar pa SEÑOR na su frontera.

19:20 I esaki lo bira un señal i un testigu pa e SEÑOR di ehérsitonan den tera di Egipto, pasobra nan lo sklama na SEÑOR pa motibu di opresornan, i E lo manda un Salbador i un Kampeon pa nan; i E lo libra nan.

19:21 Asina SEÑOR lo hasi Su mes konosí na Egipto, i e egipsionan lo konosé SEÑOR den e dia ei. Asta nan lo adorá ku sakrifisio i ofrenda, i lo hasi un promesa na SEÑOR i kumpli ku esaki.

19:22 I SEÑOR lo suta Egipto; E lo suta i kura nan. Asina nan lo bolbe serka SEÑOR i E lo tende nan i lo kura nan.

19:23 Den e dia ei lo tin un kaminda grandi for di Egipto pa Asiria, i e asirionan lo bai Egipto i e egipsionan lo bai Asiria, i e egipsionan lo adorá huntu ku e asirionan.

19:24 Den e dia ei Israel lo ta e di tres partido huntu ku Egipto i Asiria, un bendishon meimei di e tera.

19:25 Asina e SEÑOR di ehérsitonan lo bendishoná nan, bisando: "Bendishoná ta Egipto, Mi pueblo, i Asiria, e obra di Mi mannan, i Israel, Mi erensia."

Isaias 18 Isaias 20