Hoseas 8

BSNP Edita

Hoseas 8

8:1 "Pone e tròmpèt na bo lep! Manera un águila e enemigu ta bin kontra e kas di SEÑOR, pasobra nan a transgresá Mi aliansa, i a rebeldiá kontra Mi lei.

8:2 Nan ta sklama na Mi: 'Mi Dios, nos di Israel konoséBo!'

8:3 Israel a rechasá e bon; e enemigu lo pèrsiguié.

8:4 Nan a stablesé reinan, ma no pa medio di Mi; nan a nombra prensnan, ma Mi no tabata sa esei. Ku nan plata i oro nan a traha ídolo pa nan mes, pa nan mes destrukshon.

8:5 El a rechasá bo bishé, O Samaria, bisando: Mi rabia ta kima kontra nan! Te ki tempu lo ta imposibel pa tin un kurason puru meimei di nan?

8:6 Pasobra esaki tambe ta bin for di Israel! Un hòmber di ofishi a trah'é, pesei e no ta Dios; siguramente e bishé di Samaria lo wòrdu kibrá na pida-pida.

8:7 "Pasobra nan ta sembra bientu, i nan ta kosechá warwarú. E mainshi den kunuku no tin tapushi; e no ta produsí mainshi. Si e produsí mes, stranheronan lo tragu'é.

8:8 Israel a wòrdu tragá; awor nan ta meimei di e nashonnan, manera un pòchi den kual ningun hende no tin plaser.

8:9 Pasobra nan a bai Asiria, manera un buriku di mondi ku ta dwal rònt su so; Efrain a kontratá amantenan.

8:10 Maske nan ta kontratá aliadonan meimei di e nashonnan, Ami lo reuní nan awor; i nan lo kuminsá mengua pa motibu di e karga di e rei di prensnan.

8:11 "Komo ku Efrain a traha hopi altar pa piká, nan a bira p'é altarnan pa peka.

8:12 Maske Mi a skirbi p'é dies mil presepto di Mi lei, nan ta wòrdu konsiderá komo un kos straño.

8:13 Pa loke ta Mi ofrendanan di sakrifisio, nan ta sakrifiká e karni i ta kom'é, ma SEÑOR no tin delisia den nan. Awor E lo kòrda nan inikidat, i kastigá nan pa nan pikánan; nan lo bolbe Egipto.

8:14 Pasobra Israel a lubidá Esun ku a trah'é, i a traha palasionan; i Juda a multipliká statnan fortifiká, ma Ami lo manda un kandela riba su statnan, pa esaki kaba ku su palasionan."

Hoseas 7 Hoseas 9