Hoseas 7

BSNP Edita

Hoseas 7

7:1 "Ora Mi kier a kura Israel, e inikidat di Efrain a bin na kla, i e maldat di Samaria, pasobra nan ta trata ku engaño; e ladron ta drenta bai paden, bandidonan ta plùnder pafó.

7:2 I nan no ta konsiderá den nan kurason ku Mi ta kòrda tur nan maldat. Awor nan echonan ta tur rònt di nan; nan ta dilanti di Mi kara.

7:3 "Ku nan maldat nan ta hasi rei kontentu, i e prensnan ku nan mentiranan.

7:4 Nan tur ta kibradó di matrimonio, manera un fòrnu keintá dor di un panadero, ku ta stòp di waya e kandela for di ora di mansa e mansa te ora ku e reis.

7:5 Riba e dia di nos rei, e prensnan a bira malu di e kalor di biña; e tabata tene man ku hasidónan di bofon.

7:6 Pasobra nan kurason ta manera un fòrnu, ora nan ta yega na nan lugá di ataká; henter anochi nan rabia ta keda sendí, i mainta e ta lanta i ta kima manera un kandela tur na flam.

7:7 Nan tur ta kayente manera fòrnu, i nan ta kaba ku nan gobernantenan; tur nan reinan a kai. Ningun di nan no ta sklama na Mi.

7:8 "Efrain ta meskla su mes ku e nashonnan; Efrain a bira un pan buskuchi ku no a wòrdu birá.

7:9 Stranheronan ta devorá su forsa, ma e no sa esaki; kabei blanku tambe ta mustra aki i aya, ma e no sa esaki.

7:10 Ounke ku e orguyo di Israel ta testifiká kontra djé, tòg nan no a bolbe na SEÑOR nan Dios, ni nan no a busk'E pa tur esaki.

7:11 "Asina Efrain a bira manera un palomba bobo, sin tino; nan ta yama na Egipto, nan ta bai Asiria.

7:12 Ora nan bai, lo Mi habri Mi reda riba nan; lo Mi hala nan abou manera e parhanan di shelu. Lo Mi kastigá nan konforme e proklamashon na nan asamblea.

7:13 Ai di nan, pasobra nan a bai leu for di Mi! Destrukshon pa nan, pasobra nan a rebeldiá kontra Mi! Mi kier redimí nan, ma nan ta papia mentira kontra Mi.

7:14 I nan no ta sklama na Mi for di nan kurason, ora nan ta lamentá riba nan kama; pa motibu di mainshi i biña nobo nan ta reuní, ma nan ta rebeldiá kontra Mi.

7:15 Ounke ku Mi a tren i a fortalesé nan brasanan, tòg nan ta plania maldat kontra Mi.

7:16 Nan ta bolbe, ma no serka e Haltísimo; nan ta manera un bog engañoso; nan prensnan lo kai pa medio di spada, pa motibu di nan lenga insolente. Pa esaki nan lo wòrdu bofoná na tera di Egipto.

Hoseas 6 Hoseas 8