Esdras 4
4:1
Awor ora ku e enemigunan di Juda i Benjamin a tende ku e hendenan di e eksilio tabata traha un tèmpel pa e SEÑOR Dios di Israel,
4:2
nan a bin serka Zorobabel i e kabesnan di e kasnan di e tatanan, i a bisa nan: "Laga nos traha huntu ku boso, pasobra nos, meskos ku boso, ta buska boso Dios; i nos tabata sakrifiká na djE for di e dianan di Esarhadon, rei di Asiria, kende a trese nos akinan."
4:3
Ma Zorobabel i Jesúa i e restu di e kabesnan di e kasnan di e tatanan di Israel a bisa nan: "Boso no tin nada di hasi ku nos den trahamentu di un kas pa nos Dios, ma nos mes lo traha huntu pa e SEÑOR Dios di Israel, manera rei Siro, rei di Persia, a ordená nos."
4:4
E ora ei e pueblo di e tera a deskurashá e pueblo di Juda, i a hinka miedu den nan pa traha,
4:5
i a kontratá konseheronan kontra nan pa hasi nan plan frakasá durante di tur e dianan di Siro, rei di Persia, te na e reinado di Darío, rei di Persia.
4:6
Awor durante di e reinado di Asuero, na kuminsamentu di su reinado, nan a skirbi un akusashon kontra e habitantenan di Juda i Jerusalèm.
4:7
I den e dianan di Artaherhes, rei di Persia, Bislam, Mitrídates, Tabeel i e restu di su kompañeronan a skirbi Artaherhes; i e teksto di e karta tabata skirbí na arameo i tradusí for di arameo.
4:8
Rehum, e komandante, i Simsai, e eskriba, a skirbi rei Artaherhes un karta kontra Jerusalèm asin'aki:i
4:9
Rehum, e komandante, i Simsai, e eskriba, i e restu di nan kompañeronan, e huesnan i e gobernadónan menor, e ofisialnan, e sekretarionan, e hòmbernan di Erek, e babilonionan, e hòmbernan di Susa, esta, e elamitanan,
4:10
i e restu di e nashonnan ku e gran i onorabel Asnapar a deportá i a stablesé den e stat di Samaria, i den e restu di e region na e otro banda di Riu Eufrates.
4:11
I awor esaki ta kopia di e karta ku nan a manda p'é.i "Na rei Artaherhes:i "Di Bo sirbidónan, e hòmbernan den e region na e otro banda di Riu Eufrates:
4:12
"I awor laga esaki ta konosí na rei, ku e hudiunan ku a sali for di bo a yega serka nos na Jerusalèm; nan ta rekonstruí e stat rebelde i malbado, i ta tèrminando e murayanan i ta drechando e fundeshinan.
4:13
"Awor, laga esaki ta konosí na rei, ku si e stat ei wòrdu rekonstruí i e murayanan keda kla, nan lo no paga ni tributo, ni impuesto, ni tòl mas; i esaki lo kousa daño na e reinan.
4:14
Awor pasobra nos ta haña manteneshon di palasio, i no ta pas pa nos mira rei wòrdu desonrá, pesei nos a manda pone rei na haltura,
4:15
pa un investigashon por wòrdu hasí den e bukinan di registro di bo tatanan. I lo bo deskubrí den e bukinan di registro, i haña sa ku e stat ei ta un stat rebelde i ku e ta hasi daño na reinan i na provinsianan, i ku den pasado nan a lanta revolushon den djé. Pesei e stat ei a wòrdu destruí.
4:16
Nos ta pone rei na haltura ku si e stat ei wòrdu rekonstruí i e murayanan keda kla, lo resultá ku e provinsia na e otro banda di Riu Eufrates lo no keda di bo."
4:17
E ora ei rei a manda un kontesta:i "Pa Rehum, e komandante, pa Simsai, e eskriba, i pa e restu di nan kompañeronan ku ta biba na Samaria, i pa e restu di e provinsianan na e otro banda di Riu Eufrates:i "Pas.
4:18
"I awor e dokumento ku boso a manda pa nos a wòrdu lesá na un manera bon kla mi dilanti.
4:19
I mi a saka un dekreto, i un investigashon a wòrdu hasí, i a wòrdu deskubrí ku den pasado e stat ei a lanta kontra e reinan, i ku tabatin rebeldia i lantamentu kontinuamente den djé,
4:20
ku reinan poderoso a goberná riba Jerusalèm, ku a goberná tur e provinsianan na e otro banda di Riu Eufrates, i ku tributo, impuesto i tòl a wòrdu pagá na nan.
4:21
Asina, saka awor un dekreto pa hasi e hendenan aki stòp di traha, pa e stat no wòrdu rekonstruí te ora ami saka un dekreto.
4:22
I tene kuidou pa boso no neglishá di kumpli ku esaki; pakiko daño mester resultá den pièrdè pa e reinan?"
4:23
E ora ei asina ku e kopia di e dokumento di rei Artaherhes a wòrdu lesá dilanti di Rehum i Simsai, e skriba, i nan kompañeronan, nan a bai purá serka e hudiunan na Jerusalèm, i a stòp nan ku poder di arma.
4:24
Anto e trabou na e kas di Dios na Jerusalèm a stòp, i esaki a keda para te na e di dos aña di e reinado di Darío, rei di Persia.