Esdras 10
10:1
Awor mientras ku Esdras tabata hasi orashon, i mientras ku e tabata hasi konfeshon, yora i tira su kurpa abou ku su kara te na suela dilanti di e kas di Dios, un asamblea masha grandi di hòmber, muhé i mucha a reuní serka djé for di Israel; pasobra e pueblo tabata yora amárgamente.
10:2
I Sekanias, yu hòmber di Jehiel, un di e yu hòmbernan di Elam, a kontestá i a bisa Esdras: "Nos tabata infiel na nos Dios i a kasa ku muhénan stranhero for di e pueblonan di e tera; tòg awor, apesar di esaki, tin speransa pa Israel.
10:3
Pesei anto, laga nos sera un aliansa ku nos Dios pa manda tur e muhénan i nan yunan bai, konforme e konseho di mi señor i di esnan ku ta tembla pa e mandamentu di nos Dios; i laga esaki sosodé konforme e lei.
10:4
Lanta! Pasobra e asunto aki ta bo responsabilidat, ma nos lo ta ku bo; tene kurashi i aktua."
10:5
E ora ei Esdras a lanta i a hasi e saserdotenan prinsipal, e levitanan i henter Israel hura ku nan lo hasi konforme e proposishon aki; i asina nan a hura.
10:6
Anto Esdras a lanta for di dilanti di e kas di Dios i a bai den kamber di Johanan, yu hòmber di Eliasib. I ora ku el a yega ayanan, e no a kome pan ni bebe awa, pasobra e tabata lamentá e infieldat di e eksiliadonan.
10:7
I nan a hasi un proklamashon den henter Juda i Jerusalèm pa tur e eksiliadonan, ku nan mester reuní na Jerusalèm,
10:8
i ku ken ku no kier a bin denter di tres dia, konforme e konseho di e lidernan i e ansianonan, tur su propiedatnan mester wòrdu konfiská i e mes keda ekskluí for di e asamblea di e eksiliadonan.
10:9
Asina tur e hòmbernan di Juda i Benjamin a reuní na Jerusalèm denter di tres dia. Tabata e di nuebe luna riba e di binti dia di e luna, i henter e pueblo tabata sintá riba e plenchi dilanti di e kas di Dios, temblando pa motibu di e asunto aki i pa motibu di e awaseru pisá.
10:10
E ora ei saserdote Esdras a lanta para i a bisa nan: "Boso tabata infiel i a kasa ku muhénan stranhero, i asina boso a añadí na e kulpa di Israel.
10:11
Pesei anto, hasi konfeshon na e SEÑOR Dios di boso tatanan, i hasi Su boluntat; i separá boso mes for di e pueblonan di e tera i for di e esposanan stranhero."
10:12
E ora ei henter e asamblea a kontestá i a bisa na bos haltu: "Bo tin rason! Manera bo a bisa, asina ta nos deber di hasi.
10:13
Ma e hendenan ta hopi, ta tempu di awaseru, asina ku nos no por para pafó. Ni e tarea no por wòrdu hasí den un òf dos dia, pasobra nos a transgresá grandemente den e asunto aki.
10:14
Laga nos lidernan representá henter e asamblea, i laga tur esnan den nos statnan ku a kasa ku muhénan stranhero bin na oranan stipulá, huntu ku e ansianonan i huesnan di kada stat, te ora ku e rabia ardiente di nos Dios, pa motibu di e asunto aki, wòrdu kitá for di riba nos."
10:15
Solamente Jonatan, yu hòmber di Asael, i Jahasias, yu hòmber di Tikva, a oponé esaki, huntu ku Mesulam i Sabetai, e levita ku tabata apoyá nan.
10:16
Ma e eksiliadonan a hasi asina. I saserdote Esdras a skohe hòmbernan ku tabata kabesnan di e kasnan di e tatanan pa kada un di e kasnan di nan tatanan, tur na nan nòmber. Asina nan a bin huntu riba e promé dia di e di dies luna pa investigá e asunto.
10:17
I e promé dia di e promé luna nan a kaba di investigá tur e hòmbernan ku a kasa ku muhénan stranhero.
10:18
I entre e yu hòmbernan di e saserdotenan ku a kasa ku muhénan stranhero nan a haña di e yu hòmbernan di Jesúa, yu hòmber di Josadak, i su ruman hòmbernan: Maaseias, Eliezer, Jarib i Gedalias.
10:19
I nan a hasi un promesa pa manda nan esposanan bai, i pasobra nan tabata kulpabel, nan a ofresé un karné chubatu for di e kria di bestia chikitu pa nan transgreshon.
10:20
I di e yu hòmbernan di Imer: Hanani i Zebadias;
10:21
i di e yu hòmbernan di Harim: Maaseias, Elias, Semaias, Jehiel i Uzias;
10:22
i di e yu hòmbernan di Pasur: Elioenai, Maaseias, Ismael, Natanael, Jozabad i Elasa.
10:23
I di e levitanan: Jozabad, Simei, Kelaia, (esta, Kelita), Petaias, Juda i Eliezer.
10:24
I di e kantadónan: Eliasib; i di e wardadónan-di-porta: Salum, Telem i Uri.
10:25
I di Israel: di e yu hòmbernan di Paros: Ramia, Jezias, Malkias, Mijamin, Eleazar, Malkias i Bènaia;
10:26
i di e yu hòmbernan di Elam: Matanias, Zakarias, Jehiel, Abdi, Jeremot i Elias;
10:27
i di e yu hòmbernan di Zatu: Elioenai, Eliasib, Matanias, Jeremot, Zabad i Aziza;
10:28
i di e yu hòmbernan di Bebai: Johanan, Hananias, Zabai i Atlai;
10:29
i di e yu hòmbernan di Bani: Mesulam, Maluk i Adaia, Jasub, Seal i Ramot;
10:30
i di e yu hòmbernan di Pahat-moab: Adna, Kelal, Bènaia, Maaseias, Matanias, Bezaleel, Binui i Manasés;
10:31
i di e yu hòmbernan di Harim: Eliezer, Isias, Malkias, Semaias, Simeon,
10:32
Benjamin, Maluk i Semarias;
10:33
di e yu hòmbernan di Hasum: Matenai, Matata, Zabad, Elifelet, Jeremai, Manasés i Simei;
10:34
di e yu hòmbernan di Bani: Maadai, Amram, Uel,
10:35
Bènaia, Bedias, Keluhi,
10:36
Vanias, Meremot, Eliasib,
10:37
Matanias, Matenai, Jaasai,
10:38
Bani, Binui, Simei,
10:39
Selemias, Natan, Adaia,
10:40
Maknadebai, Sasai, Sarai,
10:41
Azareel, Selemias, Semarias,
10:42
Salum, Amarias i Jose.
10:43
Di e yu hòmbernan di Nebo: Jeiel, Matitias, Zabad, Zebina, Jadau, Joel i Bènaia.
10:44
Tur esakinan a kasa ku muhénan stranhero, i algun di nan tabatin esposa ku nan tabatin yu kuné.