Esdras 1
1:1
Awor den e promé aña di Siro, rei di Persia, pa kumpli ku e palabra di SEÑOR duná pa medio di boka di Jeremias, SEÑOR a animá e spiritu di Siro, rei di Persia, asina ku el a manda un proklamashon den henter su reino, i tambe a skirbi esaki, bisando:i
1:2
"Asina Siro, rei di Persia, ta bisa: 'SEÑOR, e Dios di shelu, a dunami tur e reinonan di tera, i El a nombrami pa traha un kas p'E na Jerusalèm ku ta keda na Juda.
1:3
Ken ku tin entre boso ku ta pertenesé na Su pueblo, ku su Dios sea kuné! Lagu'é bai Jerusalèm ku ta keda na Juda, i rekonstruí e kas di SEÑOR, e Dios di Israel; E ta e Dios ku ta na Jerusalèm.
1:4
I tur sobrebibiente, na kualke lugá ku e ta biba, laga e hendenan di e lugá ei sosten'é ku plata i oro, ku biennan i ku bestianan di kria, huntu ku un ofrenda boluntario pa e kas di Dios ku ta keda na Jerusalèm.'"
1:5
E ora ei e kabesnan di e kasnan di e tatanan di Juda i Benjamin, i e saserdotenan i e levitanan, huntu ku tur esnan ku Dios a animá nan spiritu, a lanta pa bai rekonstruí e kas di SEÑOR ku ta keda na Jerusalèm.
1:6
I tur esnan ku tabata rònt di nan a yuda nan ku artíkulonan di plata, ku oro, ku biennan, ku bestianan di kria, i ku kosnan di balor, fuera di tur loke a wòrdu duná komo un ofrenda boluntario.
1:7
Tambe rei Siro a saka e artíkulonan di e kas di SEÑOR, ku Nabukodonosor a saka for di Jerusalèm bai kuné, i a pone nan den e kas di su diosnan;
1:8
i Siro, rei di Persia, a laga saka nan pa medio di man di Mitrídates, e tesorero, i el a konta nan pa Sesbasar, prens di Juda.
1:9
Awor esaki tabata nan kantidat: 30 skalchi di oro, 1.000 skalchi di plata, 29 kuchú,
1:10
30 kòmchi di oro, 410 kòmchi di plata di un otro klase, i 1.000 otro artíkulo.
1:11
Tur e artíkulonan di oro i di plata tabata 5.400. Sesbasar a trese nan tur huntu ku e eksiliadonan ku a subi bai for di Babilonia pa Jerusalèm.