Ezikiel 25
25:1
I e palabra di SEÑOR a yega na mi, bisando:
25:2
"Yu di hende, bira bo kara den direkshon di e yu hòmbernan di Amon, i profetisá kontra nan,
25:3
i bisa e yu hòmbernan di Amon: 'Skucha e palabra di Señor DIOS! Asina Señor DIOS ta bisa: "Pasobra bo a bisa: 'Ahá!' kontra Mi santuario tempu ku el a wòrdu profaná, kontra tera di Israel tempu ku el a keda desolá, i kontra kas di Juda tempu ku nan a wòrdu hibá den eksilio,
25:4
pesei, mira, Mi ta bai entregábo na e pueblonan di oriente komo erensia. Nan lo kampa meimei di bo i nan lo arma nan tèntnan meimei di bo. Nan lo kome bo frutanan i bebe bo lechi.
25:5
Lo Mi hasi Raba bira un sabana pa kamel i Amon un lugá pa tou di karné sosegá. E ora ei boso lo sa ku Ami ta SEÑOR."
25:6
Pasobra asina Señor DIOS ta bisa: "Pasobra bo a bati man i a bati pia abou i a gosa ku tur malisia di bo kurason kontra tera di Israel,
25:7
pesei, mira, Mi a saka Mi man kontra bo i lo Mi entregábo na e nashonnan komo botín. Lo Mi kòrtabo kita for di meimei di e pueblonan i hasibo peresé for di meimei di e teranan. Lo Mi destruíbo. Asina lo bo sa ku Ami ta SEÑOR."
25:8
'Asina Señor DIOS ta bisa: "Pasobra Moab i Seir ta bisa: 'Ata, kas di Juda ta meskos ku tur e nashonnan,'
25:9
pesei, mira, Mi ta bai kita e statnan ku ta keda na e subida di Moab, e statnan ku ta keda na su fronteranan: Bèt-jesimot, Baal-meon i Kiriataim, e gloria di e tera,
25:10
i lo Mi duna Moab, huntu ku e yu hòmbernan di Amon, na e pueblonan di oriente komo erensia, asina ku e nashonnan lo no kòrda e yu hòmbernan di Amon mas.
25:11
Asina lo Mi ehekutá huisio riba Moab, i nan lo sa ku Ami ta SEÑOR."
25:12
'Asina Señor DIOS ta bisa: "Pasobra Edòm a aktua kontra kas di Juda dor di tuma vengansa, i a bira masha kulpabel, i a tuma vengansa riba nan,"
25:13
pesei, asina Señor DIOS ta bisa: "Ami tambe lo saka Mi man kontra Edòm i kòrta hende i bestia kita for di riba djé; lo Mi lagu'é keda desolá! For di Teman te na Dedan nan lo kai pa medio di spada.
25:14
Lo Mi pone Mi vengansa kontra Edòm den man di Mi pueblo Israel. Pesei nan lo trata ku Edòm segun Mi rabia i segun Mi furia. Asina nan lo konosé Mi vengansa," Señor DIOS ta deklará.
25:15
'Asina Señor DIOS ta bisa: "Pasobra e filisteonan a aktua ku vengansa i a tuma vengansa ku menospresio den nan kurason, pa destruí ku enemistat perpetuo,"
25:16
pesei, asina Señor DIOS ta bisa: "Mira, Mi ta bai saka Mi man kontra e filisteonan, i lo Mi kòrta e sereteonan kit'afó, i destruí e restante ku ta keda na kosta di laman.
25:17
Lo Mi ehekutá vengansa grandi kontra nan ku reprendementunan furioso. E ora ei nan lo sa ku Ami ta SEÑOR, ora Mi venga Mi mes riba nan."'"