Eksodo 6

BSNP Edita

Eksodo 6

6:1 E ora ei SEÑOR a bisa Moisés: "Awor lo bo mira kiko Mi ta bai hasi ku Farao; pasobra pa motibu di un man poderoso e lo laga nan bai, i pa motibu di un man poderoso e lo kore ku nan for di su tera."

6:2 Dios a sigui papia ku Moisés i a bis'é: "Ami ta SEÑOR;

6:3 i Mi a paresé na Abraham, Isaak i Jakòb komo Dios Todopoderoso, ma ku Mi nòmber, SEÑOR, Mi no a hasi Mi mes konosí na nan.

6:4 I tambe Mi a stablesé Mi aliansa ku nan, pa duna nan tera di Kanaan, e tera kaminda nan a keda biba pa un tempu.

6:5 I ademas, Mi a tende e kehamentu di e yunan di Israel, pasobra e egipsionan ta tene nan bou di sklabitut; i Mi a kòrda riba Mi aliansa.

6:6 "Pesei, bisa e yunan di Israel: 'Ami ta SEÑOR, i Ami lo saka boso for di bou di e karganan di e egipsionan, i lo Mi libra boso for di nan sklabitut. Tambe lo Mi redimí boso ku un brasa ekstendí i ku huisionan pisá.

6:7 I lo Mi tuma boso komo Mi pueblo, i lo Mi ta boso Dios; i boso lo sa ku Ami ta SEÑOR boso Dios, Kende a saka boso for di bou di e karganan di e egipsionan.

6:8 I lo Mi hiba boso na e tera ku Mi a hura di duna Abraham, Isaak i Jakòb, i lo Mi duna boso esaki komo un erensia; Ami ta SEÑOR.'"

6:9 Di e manera aki Moisés a papia ku e yunan di Israel, ma nan no a skucha Moisés pa motibu di falta di ánimo i pa motibu di sklabitut kruel.

6:10 Awor SEÑOR a papia ku Moisés, bisando:

6:11 "Bai bisa Farao, rei di Egipto, pa laga e yunan di Israel sali for di su tera."

6:12 Ma Moisés a papia dilanti di SEÑOR, bisando: "Mira, e yunan di Israel no a skuchami. Kon anto Farao lo skuchami, siendo ku mi no ta papia bon?"

6:13 E ora ei SEÑOR a papia ku Moisés i ku Aaron, i a duna nan un òrdu pa e yunan di Israel i pa Farao, rei di Egipto, pa saka e yunan di Israel for di tera di Egipto.

6:14 Esakinan ta e kabesnan di e kasnan di nan tatanan. E yu hòmbernan di Ruben, Israel su primogénito, tabata Hanok i Palú, Hezron i Karmi; esakinan ta e famianan di Ruben.

6:15 I e yu hòmbernan di Simeon tabata Jemuel, Jamin, Ohad, Jakin, Zohar i Saul, yu hòmber di un muhé kananeo; esakinan ta e famianan di Simeon.

6:16 I esakinan ta e nòmbernan di e yu hòmbernan di Leví segun nan generashonnan: Gerson, Koat i Merari; i Leví a biba shent'i trint'i shete aña.

6:17 E yu hòmbernan di Gerson tabata Libni i Simei, segun nan famianan.

6:18 I e yu hòmbernan di Koat tabata Amram, Izhar, Hebròn i Uziel; i Koat a biba shent'i trint'i tres aña.

6:19 I e yu hòmbernan di Merari tabata Mahli i Musi. Esakinan ta e famianan di e levitanan segun nan generashonnan.

6:20 I Amram a kasa ku Jokabed, ruman muhé di su tata, i Jokabed a haña Aaron i Moisés p'é; i Amram a biba shent'i trint'i shete aña.

6:21 I e yu hòmbernan di Izhar tabata Koré, Nefeg i Zikri.

6:22 I e yu hòmbernan di Uziel tabata Misael, Elzafan i Sitri.

6:23 Aaron a kasa ku Eliseba, yu muhé di Aminadab, ruman muhé di Nason; i Eliseba a haña Nadab i Abiú, Eleazar i Itamar p'é.

6:24 I e yu hòmbernan di Koré tabata Asir, Elkana i Abiasaf; esakinan ta e famianan di e koreitanan.

6:25 I Eleazar, yu hòmber di Aaron, a kasa ku un di e yu muhénan di Putiel, i el a haña Finees p'é. Esakinan ta e kabesnan di e kasnan di e tatanan di e levitanan segun nan famianan.

6:26 Ta ku e mesun Aaron i Moisés aki SEÑOR a papia, bisando: "Saka e yunan di Israel for di tera di Egipto segun nan ehérsitonan."

6:27 Esakinan ta esnan ku a papia ku Farao, rei di Egipto, pa saka e yunan di Israel for di Egipto; ta e mesun Moisés i Aaron.

6:28 Awor a sosodé ku dia SEÑOR a papia ku Moisés na tera di Egipto,

6:29 SEÑOR a papia ku Moisés, bisando: "Ami ta SEÑOR. Bisa Farao, rei di Egipto, tur loke Mi bisabo."

6:30 Ma Moisés a bisa dilanti di SEÑOR: "Mira, mi no ta papia bon; kon anto Farao lo skuchami?"

Eksodo 5 Eksodo 7