Eksodo 21

BSNP Edita

Eksodo 21

21:1 "Awor esakinan ta e ordenansanan ku bo mester pone nan dilanti.

21:2 "Si bo kumpra un esklabu hebreo, e mester sirbi seis aña largu, ma e di shete aña e mester sali liber, sin paga nada.

21:3 Si e bin su so, e mester sali bai su so; si e ta esposo di un esposa, su esposa mester sali bai huntu kuné.

21:4 Si su shon dun'é un esposa, i esaki haña yu hòmbernan òf yu muhénan p'é, e esposa ku su yunan lo pertenesé na e shon di e esposa, i e hòmber mester sali bai su so.

21:5 "Ma si e esklabu bisa bon kla: 'Mi stima mi shon, mi esposa i mi yunan; mi no kier sali liber,'

21:6 e ora ei su shon mester hib'é dilanti di e huesnan. Despues e shon mester hib'é na e porta òf na e kosein-di-porta, i su shon mester bora su orea ku prim; i e esklabu mester sirbié pa semper.

21:7 "I si un hòmber bende su yu muhé komo esklabu, esaki no mester sali liber manera e esklabunan hòmber ta hasi.

21:8 Si e no ta agradá su shon ku a destin'é pa su mes, e ora ei e shon mester lagu'é wòrdu redimí. E no tin outoridat pa bend'é ku un pueblo stranhero, pa motibu ku el a trata kuné na un manera traishonero.

21:9 I si e destin'é pa su yu hòmber, e mester trat'é segun e derecho di yu muhé.

21:10 Si e tuma un otro muhé pa su mes, e no mag redusí su kuminda, su paña ni su derechonan matrimonial.

21:11 I si e hòmber no hasi e tres kosnan aki p'é, e mester sali liber, sin paga plaka.

21:12 "Esun ku dal un hende asina ku e ta muri mester wòrdu matá sigur.

21:13 Ma si e no a hasi esaki intenshonalmente, ma ta Dios a lagu'é kai den su man, e ora ei Ami lo stipulá un lugá pa boso na unda e mester hui bai.

21:14 Ma si un hende aktua ku engaño pa ku su próhimo i mat'é ku astusia, bo mester kit'é for di Mi altar, pa e muri.

21:15 "I esun ku dal su tata òf su mama mester wòrdu matá sigur.

21:16 "I esun ku sekuestrá un hende, sea ku e ta bend'é òf e wòrdu hañá den su poder, mester wòrdu matá sigur.

21:17 "I esun ku maldishoná su tata òf su mama mester wòrdu matá sigur.

21:18 "I ora hòmbernan tin un pleitu i esun dal e otro ku piedra òf ku moketa i e no muri, ma keda na kama,

21:19 si e lanta kana rònt pafó ku su garoti, e ora ei esun ku a dal é lo keda sin haña kastigu; solamente, e mester paga pa e dianan ku esun ku el a dal no por a traha, i pèrkurá p'é te ora ku el a kura kompletamente.

21:20 "I si un hende dal su esklabu hòmber òf muhé ku un bara i e muri na su man, e mester wòrdu kastigá.

21:21 Ma si e esklabu sobrebibí un òf dos dia, ningun vengansa no mester wòrdu tumá; pasobra ta su propiedat e ta.

21:22 "I si hòmbernan ta bringa ku otro i nan dal un muhé na estado, asina ku e ta pèrdè su yu, ma no tin otro daño, e ora ei e hòmber mester paga but sigur manera esposo di e muhé eksigí di djé; i e mester paga manera e huesnan disidí.

21:23 Ma si tin otro daño, e ora ei bo mester pone komo kastigu bida pa bida,

21:24 wowo pa wowo, djente pa djente, man pa man, pia pa pia,

21:25 kimá pa kimá, herida pa herida, gòlpi pa gòlpi.

21:26 "I si un hende dal su esklabu hòmber òf muhé den su wowo i destruí esaki, e mester lagu'é sali liber pa motibu di su wowo.

21:27 I si e dal su esklabu hòmber òf muhé bula un djente, e mester lagu'é sali liber pa motibu di su djente.

21:28 "I si un buey kacha un hòmber òf un muhé mata, e buey mester wòrdu piedrá sigur, i hende no mag kome su karni; ma doño di e buey no mester haña kastigu.

21:29 Ma si un buey anteriormente tabatin kustumber di kacha i su doño a wòrdu spièrtá, i sinembargo e no ta ser'é, i e buey mata un hòmber òf un muhé, e buey mester wòrdu piedrá i su doño tambe mester wòrdu matá.

21:30 Si plaka di reskate wòrdu eksigí di djé, e ora ei pa redenshon di su bida e mester duna loke nan eksigí di djé.

21:31 Sea ku e buey kacha un yu hòmber òf un yu muhé, mester wòrdu hasí kuné segun e mesun regla aki.

21:32 Si e buey kacha un esklabu hòmber òf muhé, e doño mester duna doño di e esklabu trinta siklo di plata, i e buey mester wòrdu piedrá.

21:33 "I si un hòmber habri un pos òf koba un pos i keda sin tap'é, i un buey òf buriku kai aden,

21:34 doño di e pos mester hasi restitushon; e mester duna plaka na doño di e bestia morto, i e bestia morto mester bira di djé.

21:35 "I si un hende su buey heridá esun di un otro hende, i esaki muri, e ora ei nan mester bende e buey bibu i parti e plaka i tambe parti e buey morto.

21:36 Ma si ta konosí ku e buey anteriormente tabatin kustumber di kacha i tòg su doño no a ser'é, siguramente e doño mester paga buey pa buey, i e bestia morto mester bira di djé.

Eksodo 20 Eksodo 22