Ester 7
7:1
Awor rei i Haman a bin pa bebe biña serka reina Ester.
7:2
I riba e di dos dia tambe, ora nan tabata bebe nan biña na e bankete, rei a bisa Ester: "Kiko ta bo petishon, reina Ester? Lo bo hañ'é. I kiko ta bo deseo? E lo wòrdu kumplí, asta mitar di e reino."
7:3
E ora ei reina Ester a kontestá i a bisa: "Si mi a haña grasia den bo bista, O rei, i si ta agradá rei, laga mi bida wòrdu duná na mi komo mi petishon, i mi pueblo komo mi deseo;
7:4
pasobra nos a wòrdu bendí, ami i mi pueblo, pa wòrdu destruí, pa wòrdu matá i pa wòrdu eliminá. Awor si ta komo esklabu so nos a wòrdu bendí, hòmber i muhé, lo mi a keda ketu, pasobra nos aflikshon no por wòrdu kompará ku e daño ku rei lo sufri pa motibu di esaki."
7:5
E ora ei rei Asuero a puntra reina Ester: "Ta ken e ta, i na unda e ta, esun ku lo a tribi di hasi tal kos?"
7:6
I Ester a bisa: "Un atversario i un enemigu, e malbado Haman aki ta!" E ora ei Haman a spanta mashá dilanti di rei i reina.
7:7
I rei a lanta den su furia for di e bankete di biña i a bai den e hòfi di e palasio; ma Haman a keda pa supliká reina Ester pa su bida, pasobra el a mira ku rei a tuma un desishon fatal kontra djé.
7:8
Awor ora rei a bolbe for di e hòfi di palasio na e lugá kaminda nan tabata bebe biña, Haman a kai riba e sofá kaminda Ester tabata. Anto rei a bisa: "Asta reina e kier violá, anto ku ami den kas?" Asina ku e palabra aki a sali for di boka di rei, nan a tapa kara di Haman.
7:9
E ora ei Harbona, un di e eunukonan ku tabata sirbi rei, a bisa: "Ata e palu-di-horka di sinkuenta kodo haltu ku Haman a traha pa Mardokeo, kende a papia na fabor di rei, ta pará na e kas di Haman." Anto rei a bisa: "Kologá Haman na djé."
7:10
Asina nan a kologá Haman na e palu-di-horka ku el a prepará pa Mardokeo, i rei su rabia a baha.