Ester 5
5:1
Awor a sosodé ku riba e di tres dia Ester a bisti su pañanan real i a bai para riba e plenchi paden di rei su palasio, dilanti di rei su salanan, i rei tabata sintá riba su trono real den e sala real, enfrente di e entrada di palasio.
5:2
I a sosodé ku ora rei a mira reina Ester pará riba e plenchi, el a haña grasia den su bista; i rei a ekstendé na Ester e sèpter di oro ku e tabatin den su man. Asina Ester a hala serka i a toka punta di e sèpter.
5:3
E ora ei rei a bis'é: "Ki ta molestiábo, reina Ester? I kiko ta bo deseo? Lo e wòrdu duná na bo, asta mitar di e reino."
5:4
I Ester a bisa: "Si ta agradá rei, laga rei i Haman bin awe na e bankete ku mi a prepará pa rei."
5:5
Anto rei a bisa: "Trese Haman lihé pa nos hasi manera Ester ta deseá." Asina rei i Haman a bin na e bankete ku Ester a prepará.
5:6
I mientras ku nan tabata bebe biña na e bankete, rei a bisa Ester: "Kiko ta bo petishon, pasobra lo bo hañ'é. I kiko ta bo deseo? Lo e wòrdu kumplí, te asta mitar di e reino."
5:7
Asina Ester a kontestá i a bisa: "Mi petishon i mi deseo ta:
5:8
si mi a haña grasia den bista di rei, i si ta agradá rei pa kumpli ku mi petishon i hasi loke mi ta deseá, anto ku rei i Haman bin na e bankete ku lo mi prepará pa nan, i mañan lo mi hasi manera rei ta bisa."
5:9
Anto e dia ei Haman a sali bai kontentu i ku alegria den su kurason; ma ora Haman a mira Mardokeo na porta di rei, i ku e no a lanta para p'é ni tembla su dilanti, Haman a yena ku rabia riba Mardokeo.
5:10
Sinembargo, Haman a dominá su mes i a bai su kas. Anto, despues di a yama su amigunan i su esposa Zeres huntu,
5:11
Haman a konta nan di e gloria di su rikesa, di e kantidat di su yu hòmbernan, di tantu biaha ku rei a elogi'é, i kon rei a hals'é riba e prensnan i sirbidónan di rei.
5:12
Tambe Haman a bisa: "Asta reina Ester no ta laga ningun otro hende sino ami so bin huntu ku rei na e bankete ku el a prepará; i pa mañan tambe mi ta invitá serka djé huntu ku rei.
5:13
Tòg tur esaki no ta sirbimi di nada tanten ku mi ta mira Mardokeo, e hudiu, ta sinta na porta di rei."
5:14
E ora ei su esposa Zeres i tur su amigunan a bis'é: "Laga traha un palu-di-horka di sinkuenta kodo haltu i pidi rei mañan mainta pa laga horka Mardokeo na djé; despues bai bankete ku rei kontentu asina." I e konseho a agradá Haman; asina el a laga traha e palu di horka.