Predikador 1

BSNP Edita

Predikador 1

1:1 E palabranan di e Predikadó, yu hòmber di David, rei di Jerusalèm.

1:2 "Banidat di banidatnan," e Predikadó ta bisa, "Banidat di banidatnan! Tur ta banidat."

1:3 Ki probecho hende tin di tur su trabou ku e ta hasi bou di solo?

1:4 Un generashon ta bai i un generashon ta bin, ma tera ta permanesé pa semper.

1:5 Tambe solo ta sali i solo ta drenta, i ta pura bai bèk na e lugá for di unda e ta sali.

1:6 Bientu ta supla bai sùit i ta bira bai nòrt; bientu ta sigui bira kontinuamente, i siguiendo su kurso, e ta bolbe.

1:7 Tur riu ta kore bai laman, tòg laman no ta yena. Na e lugá for di unda riunan ta bin, aya nan ta bolbe bai.

1:8 Tur kos ta un kansansio, mas ku hende por ekspresá. Nunka wowo no ta keda sasiá di mira, ni orea di tende.

1:9 Loke tabata ta loke lo ta, i loke a wòrdu hasí ta loke lo wòrdu hasí. Asina no tin nada nobo bou di solo.

1:10 Akaso tin algu ku hende por bisa di djé: "Mira esaki, e ta nobo"? Ya el a eksistí kaba pa siglonan ku tabata promé ku nos.

1:11 No tin rekuèrdo di kosnan di antes, ni di kosnan ku lo sosodé despues; lo no tin rekuèrdo di nan serka esnan ku lo bin despues ainda.

1:12 Ami, e Predikadó, tabata rei di Israel na Jerusalèm.

1:13 I mi a pone mi kurason pa buska i investigá pa medio di sabiduria, tur loke a wòrdu hasí bou di shelu. Ta un tarea penoso ku Dios a duna e yunan di hende pa wòrdu afligí kuné.

1:14 Mi a mira tur e obranan ku a wòrdu hasí bou di solo, i ata, tur ta banidat i korementu tras di bientu.

1:15 Loke ta trosí no por wòrdu hasí stret, i loke ta falta no por wòrdu kontá.

1:16 Mi a bisa mi mes: "Mira, mi a krese i a oumentá den sabiduria, mas ku tur ku a goberná Jerusalèm promé ku mi; i mi kurason a eksperensiá hopi sabiduria i konosementu."

1:17 I mi a pone mi kurason pa konosé sabiduria i pa konosé lokura i bobedat; mi a realisá ku esaki tambe ta korementu tras di bientu.

1:18 Pasobra den hopi sabiduria tin hopi tristesa, i oumento di konosementu ta resultá den oumento di doló.

Proverbionan 31 Predikador 2