Deuteronomio 19
19:1
"Ora SEÑOR bo Dios kaba ku e nashonnan, kende nan tera SEÑOR bo Dios ta dunabo, i bo kore ku nan i bai biba den nan statnan i den nan kasnan,
19:2
e ora ei apartá tres stat pa bo mes meimei di e tera ku SEÑOR bo Dios ta dunabo pa bo poderá di djé.
19:3
Prepará e kamindanan pa bo mes, i parti na tres pida e teritorio di bo tera ku SEÑOR bo Dios lo dunabo komo erensia, pa tur matadó por hui bai ayanan.
19:4
"Awor esaki ta e kaso di e matadó ku por hui bai ayanan i keda na bida: ora ku e mata su amigu no intenshonalmente, sin ku e tabatin odio kontra djé den pasado--
19:5
manera ora un hòmber bai den mondi ku su amigu pa kap palu, i e zwai e hacha ku su man pa kap e palu, i e kabes di heru kita for di e kabu i dal su amigu, asina ku e ta muri--e por hui bai na un di e statnan aki i keda na bida;
19:6
pa e vengadó di sanger, den e kayente di su rabia, no pèrsiguí e matadó i alkans'é, pasobra e kaminda ta largu, i mat'é, maske e no tabata meresé morto, komo ku e no tabatin odio kontra djé den pasado.
19:7
Pesei mi ta ordenábo, bisando: 'Lo bo apartá tres stat pa bo mes.'
19:8
"I si SEÑOR bo Dios hasi bo teritorio mas grandi, manera El a hura na bo tatanan, i dunabo henter e tera ku El a primintí di duna bo tatanan--
19:9
si bo pèrkurá di kumpli ku henter e mandamentu aki ku mi ta ordenábo awe, pa stima SEÑOR bo Dios i pa kana den Su kamindanan semper--e ora ei bo mester añadí tres stat mas pa bo mes na e tresnan aki.
19:10
Asina sanger inosente lo no wòrdu dramá meimei di e tera ku SEÑOR bo Dios ta dunabo komo erensia, i kulpa di sanger keda riba bo.
19:11
"Ma si tin un hende ku ta odia su próhimo i ta skonde ward'é, i ta lanta kontra djé i ta dal é asina ku e ta muri, i e hui bai na un di e statnan aki,
19:12
e ora ei e ansianonan di su stat mester manda busk'é, sak'é for di einan i entregu'é den man di e vengadó di sanger, pa e muri.
19:13
No tene duele di djé, ma bo mester kita sanger di e inosente for di Israel, pa bai bon ku bo.
19:14
"No kita e markanan di propiedat di bo próhimo, ku e antepasadonan a pone den bo erensia ku bo ta bai eredá na e tera ku SEÑOR bo Dios ta dunabo, pa bo poderá di djé.
19:15
"Un solo testigu no mester lanta kontra un hende pa motibu di kualke inikidat òf kualke piká ku el a kometé; riba testimonio di dos òf tres testigu un kaso ta keda konfirmá.
19:16
"Si un testigu falsu lanta kontra un hende pa akus'é di mal echo,
19:17
e ora ei tur dos hòmber ku tin e pleitu mester para dilanti di SEÑOR, dilanti di e saserdotenan i e huesnan ku lo ta einan den e dianan ei.
19:18
I e huesnan mester hasi un investigashon profundo; i si e testigu ta un testigu falsu i el a akusá su ruman falsamente,
19:19
e ora ei boso mester hasi kuné meskos ku e tabatin intenshon di hasi ku su ruman. Asina bo mester kita e maldat for di meimei di boso.
19:20
I esnan ku keda lo tende i tene miedu, i nunka mas lo hasi un maldat asina meimei di boso.
19:21
Pesei, no tene duele: bida pa bida, wowo pa wowo, djente pa djente, man pa man, pia pa pia.